樂富喺香港九龍獅子山腳，九龍塘東北，九龍城西北，屬於黃大仙區。佢以前叫老虎岩，但係因為老虎呢個名殺氣大，所以香港政府就改用「樂富」呢個諧音嚟稱呼呢處。以前老虎岩有出晒名嘅老虎岩木屋區，後嚟徙置大廈起好，就成為今日嘅樂富邨。因為港鐵開咗個樂富站，就連佢北面嘅橫頭磡都畀人當做樂富嘅一部份。
