聖經新標點和合本
聖經新標點和合本（英文：Chinese Union Version with New Punctuation，縮寫：CUNP 或 CUVNP）喺1988年出版，由聯合聖經公會組織聖經學者、翻譯顧問同編輯人員，以《聖經和合本》為基礎，用現代中文標點符號格式修訂。《新標點和合本》喺用語同文體上基本冇改動[1]。目前香港聖經公會銷售嘅中文聖經，主要亦係以《新標點和合本》同《和合本修訂版》為主[2]。1988年《新標點和合本》同1919年《和合本》嘅關係，就好似1769年《欽定版聖經》同1611年《欽定版聖經》，前者更新咗拼寫同標點，令到格式同現代一致。
特點
編輯- 主要以現代通用嘅標點符號代替《和合本》「凡例」所使用嘅舊標點符號；
- 原經文係詩體裁就用詩體排法；
- 新舊約用詞盡量統一，並使用現代通用字，例如用「夠」，唔用「彀」；用「才」，唔用「纔」等；
- 使用更適合嘅人名，例如以「呂便」代替「流便」、「該撒」改為「凱撒」等；
- 使用現今通用嘅地名，例如：羅馬書 15:23「士班雅」改為「西班牙」、創世記 15:18「伯拉大河」改為「幼發拉底河」等；
- 代名詞嘅第三人稱，按照情況分為男性用「他」，女性用「她」，動物用「牠」，事物用「它」，令讀者更易分別；
- 喺經文中有大細地名或地名同人名連埋一齊嘅時候，喺少數地方加個「的」字，以免混淆（例如：「猶大伯利恆」改為「猶大的伯利恆」）；
- 小標題有平行經文章節，方便讀者參考。