原子核融合
(由聚變反應跳轉過嚟)
原子核融合，簡稱核融合，又叫做核聚變，係指由質量細（低過鐵）嘅原子核，主要係指氘或者氚，喺一定條件下（好似超高溫同埋高壓）黐埋，總質量減少啲，並且釋放巨大能量嘅核反應。當原子喺勁高溫同極高壓情況下，最外層電子會被強制脫離形成半電漿態，而係呢一個時候，有啲原子會融合成更高質量嘅原子，不過過程中會流失一部分中子，形成同位素更高既元素。
原子核嘅質量蘊藏巨大能量，原子核嘅變化（由一種原子核變化為另外一種原子核）往往轉成巨大能量釋放出。如果係由重嘅原子核變化為輕嘅原子核，叫核裂變，好似原子彈爆炸；如果係由輕嘅原子核變化為重嘅原子核，叫核聚變，好似太陽發光發熱嘅能量來源。
相比核裂變，核聚變發電幾乎唔會帶來放射性污染等環境問題，因為原子唔似得核裂變咁，喺發出能量嘅同時發放迦瑪射線令自己達至平衡，而且原料可以直接取自海水中嘅氘，來源幾乎取之不盡，係理想嘅能源方式。
目前人類已經可以實現不受控制嘅核聚變，例如氫彈嘅爆炸。但係如果想令能量可以畀人類有效利用，就必須能夠合理控制核聚變嘅速度同埋規模，實現持續、平穩嘅能量輸出。科學家正努力研究點樣控制核聚變，但而家睇嚟重有好長嘅路要行。
喺2005年，部份科學家相信已經成功做出小型嘅核聚變[1]，並且得到初步驗證[2]。首個實驗核聚變發電站將選址法國[3]。
可控核聚變
編輯目前主要嘅幾種可控核聚變方式：
- 超聲波核聚變
- 雷射約束（慣性約束）核聚變
- 磁約束核聚變（托卡馬克）