聯盟式營銷

聯盟式營銷（粵拼：lyun4 mang4 sik1 jing4 siu1；英文：affiliate marketing）係營銷（尤其係數碼營銷）嘅一種做法，指一間企業畀錢（或者第啲著數）畀某位第三者（呢位第三者就係所謂嘅同盟），要呢位同盟搵方法吸引消費者嚟睇間企業嘅產品，而間企業會畀嘅錢嘅量係視乎位同盟「拉到幾多客」而定嘅^[1]。

舉個具體例子說明：想像家陣有間企業，佢聯絡第啲網站嘅營運者，搵呢啲營運者做同盟；班同盟會喺自己嘅網站（唔係由間企業經營嘅）度落廣告，啲消費者睇嗰啲網站嗰陣，可以一撳個廣告連去間企業嘅網購網站度買件產品；而間企業同佢班同盟嘅合約講明，每有一個客透過條噉嘅途徑買件產品，間企業就會畀若干量嘅酬金畀嗰位同盟。呢種做法喺廿一世紀初嘅互聯網成日都見到，例如 Amazon 等嘅大企業都用咗噉嘅做法。