聽音湖（注意「聽」字有地名變音，粵拼：ting3 jam1 wu4）係中國廣東佛山一公園兼景區，2016年開園，喺南海區西樵鎮愛國村，西樵山西北角嘅山腳位。北靠錦湖大道；西南靠樵湖東路；南靠錦湖路；東靠樵園路。佢既係佛山十大最靚公園之一，又係西樵山屬下景區之一，總面積3.7km²。
佢亦係南海區政府喺2010年提出實施「中樞兩翼核心帶動」嘅城市發展戰略時而搞出嘅保護文化項目之一，景區入面好多時都提到黃飛鴻嘅武術文化。
