腦腦介面

腦腦介面（粵拼：nou5 nou5 gaai3 min2；英文：brain-brain interface），又有叫腦對腦介面（brain-to-brain interface），係指容許多過一個腦之間直接互傳訊號嘅技術，相對於俾腦直接向機械傳訊號嘅腦機介面（brain-computer interface）：廿世紀嘅神經科學研究表明咗，記憶同思緒係以腦入面嘅電同化學訊號嘅形式存在嘅，所以理論上如果有某啲方法將兩個腦駁埋一齊，令兩個腦可以彼此之間直接傳呢啲電同化學訊號嘅話，就可以做到令兩個腦唔使開口講，都知對方諗緊乜或者直接感知到對方感受緊嘅嘢。

幾個細路戴住能夠感應佢哋腦活動嘅帽。

呢種技術喺廿一世紀初經已有取得初步嘅成功。例如有研究者試過訓練兩隻大家鼠按見到嘅光訊號撳掣（撳啱掣有嘢食），跟住再以特定嘅方法將兩隻大家鼠嘅大腦皮層（cerebral cortex；指大腦最外嗰浸神經組織）駁埋一齊，發現噉做能夠令一隻大家鼠喺同伴見到光訊號（但佢自己見唔到）嗰陣走去撳適當嘅掣－似係令兩隻大家鼠直接感受到同伴感受到嘅嘢噉。

呢種做法仲有可能俾人用諗嘢嘅方式控制第個人嘅身體：理論上，身體嘅郁動源於腦嘅控制中心（例如前額葉）向個腦做運動控制嘅腦區（可以睇主要運動皮層）傳訊號，而呢啲運動控制腦區負責控制身體嘅肌肉，所以如果有方法俾一個腦向第個腦嘅運動控制腦區傳訊號，嗰個腦就可以控制第個身體；有研究者就試過俾一個受試者（控制者）戴住特製嘅帽，頂帽能夠量度戴嗰個人嘅腦電活動，而頂帽仲接駁住部電腦，部電腦將有關控制者腦電活動嘅資訊傳去另一個受試者（被控制者）戴嗰頂帽嗰度，被控制者頂帽有裝置曉按收到嘅訊號，用電刺激被控制者嘅運動皮層（motor cortex；負責控制身體肌肉嘅一個腦區），結果發現，噉做能夠俾控制者齋靠諗嘢嚟左右被控制者嘅身體郁動。

睇埋

• 腦機介面
• 心靈感應
• Cyberpunk