臺灣地區領導人

臺灣地區領導人，或者叫臺灣當局領導人、臺灣方面領導人，係中華人民共和國政府同中華人民共和國媒體為咗描述佢哋認為冇台灣實際管轄權嘅中華民國總統，所塑造出嚟嘅一個名詞。呢個係中國大陸媒體用嘅標準詞彙，用呢個稱呼反映出中共當局認知嘅「喺台灣嘅中華民國唔係國家」嘅政治正確效果。中華人民共和國政府唔承認1949年之後遷移到台灣嘅中華民國政府，唔承認佢最高領導人嘅正式官銜「中華民國總統」。喺中國大陸經營嘅境外電視台，如鳳凰衛視，就一般用「台灣領導人」呢一個較為折衷嘅稱謂嚟指代中華民國總統。

台灣用緊「中華民國」國號，所以選舉出嘅總統正式官銜唔係「台灣總統」，法律上係中華民國總統。如果中國大陸媒體講台灣總統，等於承認台獨；如果講中華民國總統，就等於承認兩個中國。所以，中國大陸採用「台灣地區領導人」嚟代替中華民國總統：用「地區」講明台灣唔係一個國家，用「領導人」唔等同於「總統」。不過大陸媒體亦唔會稱之為「台灣省領導人」，因為咁樣稱呼等同將中華民國總統降格為省級領導人，咁樣稱呼可能會激嬲一啲傳統嘅親中國國民黨人士。雖然指同樣嘅職位，就有唔同嘅含義，正如同大陸人、外省人、中國人都有一啲唔同嘅含義。

根據北京當局嘅規定，中華人民共和國媒體一般唔可以用「中華民國」字樣描述台灣當局。不過如果新聞入面無辦法避免正式稱謂，就需要喺佢官銜或者機構名上面加引號，如「中華民國總統」、「總統府」等。