芭蕾舞手位
芭蕾舞手位（粵拼：baa1 leoi4 mou5 sau2 wai2；英文：ballet positions of the arms）係最基本嘅芭蕾舞技巧之一，指跳芭蕾舞嗰陣，跳舞嗰個人對手臂通常會擺嗰幾個特定嘅位。喺最基本嘅芭蕾舞手位當中，雙手會維持若干（相同嘅）高度，而且兩隻手掌嘅手指尖要差啲掂住，雙手手掌嘅高度可以係喺髖關節咁高、又或者係喺肚臍咁高、又或者高到喺個舞蹈員頭頂上都得；而喺第啲手位當中，雙手手臂可能會延伸並且彼此遠離，令到兩隻手掌分別去到身體嘅左右兩邊嘅遠處。而且有陣時，一個芭蕾舞蹈員又可以兩隻手分別做唔同嘅手位[1][2]。
唔同芭蕾舞門派對手位嘅定義可以好唔同，有陣時可能會用同一個名指唔同嘅手位，又或者有第啲門派冇嘅手位，例如俄羅斯派嘅芭蕾舞會指定有三個手位，其他主要門派興用五個，而香港同中國大陸嘅芭蕾舞老師多數都係用英國皇家舞蹈學院（RAD）所指定嗰套五大手位嘅[2]。
五大手位 編輯
英國皇家舞蹈學院嗰套五大手位如下[3]：
- 準備位（bras bas，又作「bras au repos」）係指個舞蹈員將雙手手臂垂低，雙手手掌要差啲掂住，手掌要喺髖關節左右咁高。顧名思義，呢個係啲芭蕾舞蹈員喺對手臂要開始做大動作之前會做一吓嘅一個手位。
- 第一手位（first position）同準備位差唔多，都係雙手手掌要差啲掂住（好似攬住某啲嘢噉），主要分別係手掌嘅高度要高過準備位嘅－第一手位嘅手掌要喺肚臍同胸骨之間嘅高度。喺意大利嘅切劇蒂派當中，第一手位會稍為低少少，去到芭蕾舞裙嗰個高度。
- 第二手位（second position）指雙手要向左右兩邊伸出去，手掌要彼此遠離，但唔完全伸直（好似攬住啲好大嘅嘢噉），手踭嘅位置要高過手腕；手瓜嘅內部要同地板平衡而前臂同手掌唔好完全面向觀眾，要稍微向下。唔同芭蕾舞門派嘅第二手位大致上都係噉，不過佢哋喺做第二手位嗰陣膊頭嘅圓度同手臂嘅高度有所不同。好多門派會要求男舞蹈員嘅手掌去到同膊頭差唔多嘅高度，而女舞蹈員手掌位置就要低少少。
- 第三手位（third position）喺唔同門派當中好唔同：
- 法國派同英國皇家舞蹈學院嗰套嘅第三手位（又有叫「bras croisé」；法文讀音：[bʁa kʁwaze]）涉及個舞蹈員左右手當中是但一隻做第一手位，另外嗰隻就做做第二手位。喺 RAD 派嘅芭蕾舞入面，啲人會將第三手位分「regular」同「in opposition」－如果話第三手位「in opposition」，意思係話擺身側面做第二手位嗰隻手係同伸出髀同邊嗰隻（例：右髀伸咗出去嘅話，「第三手位 in opposition」就係右手向側移成第二位置嘅第三手位）。
- 喺切劇蒂派當中，第三手位指個舞蹈員是但一隻手做佢哋嗰套第一手位，而另一隻就做半第二手位（睇下面）。
- 喺俄羅斯派當中，第三手位等同其他主要門派當中嘅第五手位（睇下面）。
 |
 |
 |
 |
 |
|
| 準備位 | 第一手位 | 第二手位 | 第三手位（RAD 式） | 第四手位打開 （in opposition） |
第五手位 |
- 第四手位（fourth position）分兩種：
- 第四手位打開（fourth position ouvert）指其中一隻手高舉，而另外嗰隻就做第二手位－兩隻手處於好開放嘅位置。
- 第四手位相交（fourth position croisé），喺切劇蒂派當中有叫西班牙式第四手位（Spanish fourth），指其中一隻手高舉，而另外嗰隻做第一手位。
- 喺 RAD 派當中，第四手位又係有得分「regular」同「in opposition」，原理同第三手位一樣。
- 俄羅斯派當中並冇第四手位。
- 第五手位（fifth position）喺法國派同英國皇家舞蹈學院嗰套當中如下：個舞蹈員要將雙手高舉，兩隻手掌要指向對方但唔一定要掂到；兩隻手掌位置要稍為向前令到個芭蕾舞蹈員能夠眼尾望到自己手掌，而且手掌要稍為向內，用其他手指遮住手指公；個舞蹈員對手臂關節拗彎嘅角度要大啲，令到雙手手臂好似形成一個圓形或者橢圓形噉。俄羅斯派嗌呢個手位做第三手位，而且冇指定乜嘢係第五手位。
- 除咗噉，
- 半手（demi-bras）指一隻手處於第一同第二手位之間，向外延伸。
- 半第二手位（demi-seconde）似第二手位，不過雙臂要低啲，手掌通常向下。
- 喺做芭蕾舞手位嗰陣，手板同手腕應該要放鬆，手指之間要有空間，頭要望向適當嘅方向（例如做 RAD 第五手位嘅話，頭可以望住觀眾方向或者稍微向右上或者左上望），一般嚟講，男舞蹈員做手位嗰陣雙手手板之間嘅距離會同面嘅闊度相約，而女舞蹈員做手位嗰陣雙手手板嘅距離會比較近，大約兩個手指尖嘅距離。
- 手臂圈（rond de bras；法文讀音：[ʁɔ̃ d(ə) bʁa]）係指「手臂形成嘅圓圈」，指當一個舞蹈員做各種手位嗰陣雙手手臂所形成嘅圓圈，喺做第五手位嗰時零舍容易見到[4]。
實例 編輯
-
一路做第三手位（RAD 式）一路大跳躍 -
個女舞蹈員做緊第三手位（RAD 式） -
一路做第四手位打開一路做阿拉伯斯卡舞姿 -
一路做第五手位一路做
大越步（grand jeté）
.jpg)
睇埋 編輯
攷 編輯
- ↑ Hammond, S. N. (2000). Ballet basics. McGraw-Hill Humanities, Social Sciences & World Languages.
- ↑ 2.0 2.1 Positions of the Arms in Ballet. BalletHub.
- ↑ Minden, E. G. (2007). The ballet companion: a dancer's guide to the technique, traditions, and joys of ballet. Simon and Schuster.
- ↑ Rond de Bras 互聯網檔案館嘅歸檔，歸檔日期2019年6月3號，.. Ballethub.
