英布
英布（？—前195年），秦國揚州九江六縣（安徽省六安市）人。由於受過墨刑（黥刑，粵拼：king4 jing4），因此又名黥布。喺項羽進軍咸陽、攻打關中嗰時，英布去到函谷關（家下河南省靈寶縣）打敗咗漢王劉邦嘅軍隊。當時擁有十萬兵力嘅劉邦，只得退居於壩上（陝西省西安市西北一帶）。
西元前206年，項羽分封天下，封英布做九江王。項羽流放楚義帝之後，暗中命英布殺死。楚漢戰爭時期，項羽攻打齊王田榮嗰陣，項羽叫英布幫手，但係英布話自己病咗，只係派咗幾千人去。到咗劉邦進攻彭城嗰陣，英布又冇幫項羽抵抗劉邦，項羽因此開始對英布不滿。劉邦搵人氹掂英布同佢合作，英布起兵攻打項羽，畀項羽打敗咗，唯有走去投靠劉邦。[1]
之後劉邦立英布做淮南王。喺項羽敗亡之後，英布嘅封國以六做都城，管轄埋九江、廬江、衡山同豫章郡。[1]佢同韓信、彭越共稱漢初三大名將。
漢高祖十一年（西元前196年），韓信畀漢朝誅殺咗，英布開始擔心自己，到咗彭越都畀漢朝誅殺之後，英布仲更加驚。之後英布畀下屬向朝廷告狀話佢想謀反，英布唯有真係起兵造反，畀劉邦打敗。[1]逃亡嗰陣，反畀假意幫手嘅長沙王吳臣號令鄉民殺死。