范功健

范功健（Andy Fan），香港親中派商人，名框眼鏡創辦人。國際年青才俊交流協會旗下S.P.C.青創家協會理事。

爭議

47人案組織排隊黨阻礙想旁聽嘅公眾

就2020年香港立法會選舉民主派初選，香港政府喺2021年初引用北京未經諮詢或香港人同意強行訂立嘅《港版國安法》，對民主派大肆進行政治檢控，案件拖延去到2023年2月喺西九龍裁判法院進行開審。案件得到公眾關注，唔少公眾都想去旁聽。不過，范功健就被指有份策劃喺法院門外組織「排隊黨」，組織一啲人通宵排隊攞籌但唔入場旁聽，呢啲排隊攞籌嘅人，甚至會有論更安排，同埋有800元現金報酬，從而令其他想旁聽嘅公眾未能入場。

時事評論員桑普批評有關做法係要將香港嘅審訊同大陸司法睇齊，阻止公眾同外國領事關心事件，達到減少呢單案嘅曝光率，同埋對在審被告嘅精神支持，目的卑鄙。范功健之後被揭發同國際年青才俊交流協會有關，有媒體甚至訪問埋協會創辦人兼主席彭心，但彭心就劃清界線，話件事同佢無關，話范功健「行事為人唔 Okay」，又話佢已經退出左S.P.C.青創家協會，甚至直指佢招搖作騙行騙。之後，S.P.C.國際年青才俊交流協會嘅聲明亦形容范功健嘅行為係「不法行為」。

范功健之後喺社交媒體回應事件，承認自己做蛇頭，但就話自己只係中介，完全唔知後面有乜嘢目的。