菲律賓特警

菲律賓特警又叫特種武器及戰術部隊（英文：Special Weapons and Tactics，縮寫：SWAT），係隸屬菲律賓國家警察各個警區嘅特種警察部隊。當中2010年因為馬尼拉警區特種武器及戰術部隊喺處理馬尼拉人質事件上手法拙劣，導致喺國際上被廣泛報導同受到關注。

呢個部隊並唔係特別行動部隊（Special Action Force，SAF），SAF係菲律賓國家級特種警察部隊，擁有相對精良武器裝備同更加優秀人員質素，成日派去菲律賓南部地區清剿莫洛伊斯蘭解放陣線同阿布沙耶夫等恐怖組織。而SAF亦只會喺發生好嚴重罪案同恐襲威脅時先會出動。

組織

特種武器及戰術部隊參考美國同名特種武器和戰術部隊嘅編制而組織，每個警區編制大約有20至40名人員，下設小隊，每小隊由8名人員所組成，各具專長，包括通訊、處理爆炸品同狙擊等。

爭議

菲律賓特警因為2010年8月23號嘅馬尼拉人質事件而令到更多人認識，當中有香港人甚至叫佢哋做「冇種特警」同「無能菲律賓特種部隊」，因為佢哋覺得菲律賓特警喺呢件事攞人質嘅命仔嚟搞飛，當挾持事件係個遊戲。根據CNN嘅報導，喺馬尼拉人質事件入面，證實有三名香港人畀馬尼拉警方敲爛車窗玻璃嗰時，一名靠窗位置嘅人質被直接敲死。菲律賓特警喺呢件事上面表現差劣，處理手法廣泛咁引起世界各個國家同地區嘅警察同軍事機構關注，成為咗全球反恐演習嘅負面教材，事後部份單位不約而同咁展示咗以挾持旅遊巴為題材嘅人質拯救演習。