薩滿教

薩滿教（英文：Shamanism），亦有人譯做「薩滿主義」，係一個世界性嘅原始宗教。薩滿教有兩種意思，一個係廣義上嘅意思，即係指世界上每一個民族所涉及到巫覡嘅信仰、另一個係狹義上嘅意思，即係指以西伯利亞為中心嘅亞洲民族信仰。呢種宗教有好長嘅歷史，「薩滿」嘅意思，係話一啲可以通天嘅人，通過薩滿施巫術去驅鬼治病，為族人祈福。 薩滿信仰喺原始時代就已經有，當時啲人對於好多自然現象都諗唔到點解，就覺得有一種超自然能力支配住呢啲所有嘢，慢慢啲人就將一啲自己預測唔到嘅嘢，寄託喺呢種超自然能力上，形成咗各種神靈，開始咗有薩滿信仰。 薩滿信仰喺好多地方都出現過，例如喺俄羅斯西伯利亞、百越、百僕、美洲印第安人、非洲好多民族、到北亞遊牧民族，都曾經興起薩滿信仰。

字源

17世紀後半葉歐洲一啲民族學家去到西伯利亞，見到啲通古斯人嘅「薩滿」（Shaman）信仰，之後就對呢種信仰形式產生興趣，由於當時歐洲學者對宗教形式同種類都唔識得好多，所以當啲歐洲人不斷喺其他地方旅行或者探險時，發現類似嘅信仰模式，都叫晒做「薩滿」，後來就創咗 Shamanism（薩滿主義、薩滿教）出嚟。

後來當啲人對呢種宗教形式嘅研究越來越多，開始發覺薩滿無論係稱呼、表現方式同種類都有好多種，結果出現對「薩滿」定義嘅爭論，而結果係將薩滿分為廣義上嘅薩滿同狹義上嘅薩滿，廣義上嘅薩滿即係指世界上每一個民族所涉及到巫覡嘅信仰、而狹義上嘅薩滿即係指以西伯利亞為中心嘅東北亞地區一種民族信仰，特別係指通古斯人嘅民族信仰同埋類似形式嘅其他民族信仰。

而喺中國，一直都無「薩滿」呢個叫法，古書入面，薩滿多數叫巫教，或者叫巫，根據《說文解字》：「巫，祝也。女能事無形，以舞降神者也。」無形嘅意思，即係指啲睇唔見嘅鬼神，同時反映最早嘅巫都係女性，咁係由於早期以母系社會為主，到父權掘起之後，就開始有男巫，《說文解字》：「覡，能嚴肅事神明者。在男曰覡，在女曰巫」

北宋時又叫做「甘」，《新唐書》回鶻傳下：「祠神惟主水草，祭無時，呼巫為甘。」亦叫做「珊蠻」，《三朝北盟會編》卷三：「珊蠻者，女真語巫嫗也，以其通變如神，粘罕以下，皆莫之能及。」

直到20世紀80年代中，中國考古人類學家張光直提出中國古代文明亦係一種「薩滿式文明」，之後喺中國學術界就將古代巫覡文化全部都歸晒入「薩滿教」嘅研究入面。

不過美國同日本就有啲學者認為「薩滿教」唔可以作為廣義稱呼，佢哋主張叫「民族宗教」（Folk Religion），不過由於學術界一早習慣晒叫「薩滿教」，所以「民族宗教」呢個叫法都興唔起。

分佈、類型

内文：薩滿類型

薩滿教係一個世界宗教，佢分佈極之廣泛，喺北亞，喺俄羅斯西伯利亞、百越、百僕、美洲印第安人、非洲等好多民族都有薩滿信仰，唔同民族嘅薩滿信仰都有佢哋一個稱呼，種類同職能。

薩滿神靈

薩滿教信仰理論都係建基喺萬物有靈論，以前嘅人對好多自然現象都唔知點解，對於好多自己估計唔到嘅嘢，都覺得有一啲超自然能力控制住，基於唔同現象嘅特點，而慢慢演變成一啲神神鬼鬼嘅嘢，一啲好嘅嘢就當係神做，唔好嘅嘢就當係鬼做。佢哋認為好多現象都涉及到鬼神，而喺要做呢啲涉及到鬼神嘅嘢之前，就要搵巫師去先同呢啲鬼神溝通，涉及鬼嘅就要先將啲鬼趕走，涉及神嘅嘢就先要通過獻祭或類似儀式疏通，咁樣之後再做嗰件事情就會順利得多。而呢啲神靈主要都分兩類，一種係自然神靈，另一種係社會神靈。

自然神靈

自然神靈即係指一啲大自然各種現象同埋動植物，好似天體、氣象、山川、動植物等各自都有一個神靈。例如天有天神、太陽月亮有日月神、行雷有雷神、山有山神、唔同嘅樹都有唔同嘅樹神、土地有土地神之類。動物亦都有神靈，甚至直情將某一種動物當成神靈，例黎族就認為蛇係神靈，佢哋相信蛇會保護自己。壯族就認為青蛙係神靈，佢哋甚至有青蛙節。古代藏族就認為鷹係神靈。另外，亦有啲動物神靈會識得變形，例如某啲民族就相信狐狸識變成人。北美印第安人嘅薩滿信仰亦同樣以動植物崇拜為主，佢哋會將一啲動植物形象整成圖騰嚟拜。

社會神靈

社會神靈多數係根據靈魂不滅論而嚟，所以崇拜對象主要係人，亦即係祖先崇拜同鬼魂，由於相信人死咗之後，仲有個靈魂存在，所以發展出好多哀葬嘅儀式出嚟，等屍體就算腐爛晒，靈魂都唔會因為無處容身而周圍搞搞震，所以人死咗之後一定要好好安葬。考古研究話人類喺石器時代就已經出現墓地，反映出呢種靈魂嘅觀念其實好早就已經有。

基於靈魂嘅觀念，慢慢變成祖先崇拜，最早嘅祖先崇拜都係以女神為主，例如中國傳說之中嘅女媧就係一個女嘅祖先神。法國考古學家亦發現舊石器時代好多女神象。到後來父權制度興起，開始以父系血緣為中心發展出氏族嘅社會觀念，祖先崇拜亦變成一個氏族，一個民族以致係一個社群嘅凝聚力量。

但有啲因為葬得唔好，又或者死得唔好，例如畀人謀殺、病死等，呢啲亡靈因為死得唔甘心所以會變成鬼魂，周圍害人。好多有薩滿信仰嘅民族都相信，人有病係因為有啲因為病死而變成嘅鬼魂搞搞震，咁就要請薩滿趕鬼，通常會整個草人當做隻鬼，然後將個草人送走。

祭祀

巫術

内文：巫術

巫術喺薩滿入面係一樣最重要嘅儀式，幾乎等如就係薩滿。巫術係以一啲手法去改變某啲嘢嘅一種法術，巫術嘅理論多數都係基於萬物有靈論信仰觀而嚟。根據英國人類學家弗雷澤對巫術研究，將巫術分咗做兩種；第一種係以結果影響原因，呢種叫「相似律」或者叫「模仿巫術」，即係話施巫術嘅人通過模仿而達到想要嘅結果、第二種係接觸過嘅嘢喺分開之後仍然可以維持關係，呢種叫「接觸律」或者叫「交感巫術」，即係話可以通過某個人掂過一啲嘢嚟對個人發生影響。

根據「模仿巫術」同「交感巫術」呢兩種形式為基礎，發展出各種唔同嘅巫術功能，好似男女交合、招魂、驅鬼、避邪、哀葬等。

電影

• Quantum Men (Carlos Serrano Azcona) Spain 2011

• Other Worlds (Jan Kounen) France 2004

• Bells From the Deep (Werner Herzog) Germany 1993

• The Mad Masters (Jean Rouch) France 1955

• Au pays des mages noirs (Jean Rouch) France 1947