藍戰士

藍戰士 ，英文名叫Blue Jeans，係1980年代尾活躍香港嘅流行樂隊，喺1987年成立。樂隊嘅成員全部都係好有經驗嘅樂師，但最為人熟悉嘅都係，各成員嗰頭又長又鬈嘅頭髮，同埋前衛嘅打扮。歌曲方面，有啲歌係佢地自己寫，但係都有啲係改編外國歌，再填過粵語歌詞。樂隊喺1990年解散，之後喺2004年重組過，仲加入咗新成員。

成員

• 黃良昇（鍵琴手及主音歌手，創隊成員）
• 蘇德華（主音結他手，創隊成員）
• 單立文（低音結他手，創隊成員，90年代解散嗰陣走咗）
• 鄧祖德（結他手，低音結他手，2004年重組嗰陣加入）
• 霍兆強（鼓手，2004年重組嗰陣加入）

發展歷程

Blue Jeans嘅前身係Chyna樂隊，八十年代中Chyna解散後，每個成員專注做幕後音樂工作，直到1987年，當中三位成員黃良昇、蘇德華、單立文因參加第三屆「亞太流行歌曲創作大賽香港區決賽」（CASH流行曲創作大賽嘅前身）而重組，仲改咗名做Blue Jeans，結果樂隊憑住參賽歌《豈有此理》攞到冠軍，嗰年簽埋 Sony 唱片公司入樂壇。

樂隊成立初時只係有英文名“Blue Jeans”，直到1988年5月樂隊出咗第一隻大碟嗰陣，先至有中文名「藍戰士」。

之後Blue Jeans除咗用樂隊名出咗好多隻碟之外，亦都有同其他歌手同樂隊合作。例如同林憶蓮、林志美、許冠傑合唱；同太極、Beyond、達明一派、Raidas等樂隊合唱《勁Band Super Jam》哩首歌。成員仲拍埋戲、做埋電影配樂。

樂隊喺1990年4月出咗同名嘅大碟《Blue Jeans》之後，三位成員就分開，黃良昇轉咗行做保險，蘇德華、單立文就做返幕後音樂工作，直到2004年樂隊重組。因為單立文另外有嘢做，唔能夠參與嗰次嘅重組，所以由太極樂隊嘅前經理人鄧祖德替，而前民間傳期成員霍兆強做鼓手，出咗《放眼》哩隻碟。

出過嘅碟

• 《Blue Jeans》(EP)（1987年12月）
• 《藍戰士》（1988年5月）
• 《永遠是你好友》（1989年2月）
• 《Blue Jeans》(EP)（1989年）
• 《Blue Jeans》(EP)（1989年）
• 《Blue Jeans》(也許明日再遇上)（1990年4月）
• 《Blue Jeans 白金珍藏版》（1990年）
• 《放眼》（2004年9月）

做過嘅戲

• 《金裝大酒店》（1988年）

有關嘅網頁

• 〈藍戰士官方網站〉。