蘇州史
提示：呢篇文講嘅唔係蘇州屎。
前514年，吳國國王闔閭起都城，叫做闔閭城，闔閭城個位置就係今日蘇州。前473年，越國滅咗吳國，蘇州變成越國都城，直到前306年楚國滅越國。
前222年，秦始皇滅楚國後，置會稽郡，郡治吳縣，即係蘇州市區。
隋朝開皇九年（589年）吳縣升格做蘇州。同時隨住大運河發展，蘇州逐漸發展成全國重要商埠。到唐朝初，蘇州做咗江南道治所，開元廿一年（733年）江南道分開兩半後，蘇州繼續做江南東道治所。
宋朝蘇州置平江府，係浙江西道治所，元朝改做平江路，元末張士誠起義時再改平江路做隆平府。
明朝置蘇州府，直隸南京，駐有應天巡撫。到清朝，蘇州係江蘇巡撫同江蘇布政使駐地。
咸豐十年（1860年）太平天國軍攻入蘇州，將領李秀成起咗個忠王府。同治二年（1863年）清軍攞返蘇州，但蘇州受到嚴重破壞，唔似得舊時咁繁盛。光緒廿一年（1895年）清朝同日本簽《馬關條約》，蘇州開放做對外商埠，城南設立過日本租界。
中華民國元年（1912年），廢蘇州府留吳縣。中華人民共和國1949年執政後，設蘇州市，由蘇南行政公署蘇州專區管，1953年由重新成立嘅江蘇省管，1983年撤銷蘇州地區併入蘇州市。