蘇菲派

蘇菲派（Sūfī）係伊斯蘭教入面一個神秘主義派系，大約7世紀末產生出嚟。呢一派信奉蘇菲主義（Sufism）學說。蘇菲，係亞拉伯話音譯自 Sūfī，原意係羊毛咁解，因為呢派嘅人都鍾意着粗毛衫而咁叫，不過亦有另一個解釋話係指清淨（Safa）同高位（Saff）。

佢哋以《古籣經》入面關於敬畏、順從、堅忍、讚諗跪拜等經文做依據，兼受新柏拉圖主義、諾斯替主義、印度瑜伽派加埋好多外來思想影響而演變出嚟。

蘇菲最先係由阿布哈希姆（Abū Hāshim）開始咁叫先。原本，伊斯蘭教係一個入世嘅宗教，以滿足現實生活需要為主，但總有啲人需要有精神生活需要，而蘇菲派初期正正就係因為有人不滿倭馬亞王朝奢侈作風，認為咁樣做造成腐化，於是根據聖訓，搵出一啲守貧、禁欲、苦行呢啲形式去實踐信仰，到咗8世紀開始有人學佢哋嘅生活方式同聽佢哋嘅教誨，最後形成一套以精神修煉為核心嘅出世信仰，通過冥想、靜思去達到人主合一境界。到13世紀開始有正式嘅蘇菲派社團出現，後來又有人話人主合一係無可能，最多只可以做到最接近真主嘅穆罕默德境界，於是喺18世紀又分咗「新蘇菲派」出嚟。

呢派人信仰特徵係佢哋會有啲行為好似食玻璃、走炭火、又或者聽住音樂一路跳舞一路狂轉圈咁。另外佢哋奉行導師制，由教團道統系導師向門人弟子傳教奧秘。

而家呢派主要活躍喺印度、巴基斯坦、蘇丹、埃及同北非。另外佢哋喺明末傳入中國之後，演變出門宦同道堂，新疆地區亦有以蘇菲主義為基礎嘅依禪派。

教團

參考

主要參考書

• 《伊斯蘭教》 金宜久著 宗教文化出版社 ISBN 7801230868/G29
• 《亞拉伯通史》 商務印書館 ISBN 710001865X
• 《伊斯蘭教史》 金宜久著 江蘇人民出版社 ISBN 7214041480
• 《伊斯蘭教史》 王懷德、郭寶華著 ISBN 7227007855