血含氧量

血含氧量（英文：oxygen saturation），又叫血氧濃度、血氧飽和度，係指血液入邊飽氧血紅蛋白同整體血紅蛋白（飽氧同唔飽氧）嘅比例，一般用百分比表示。一個人嘅身體要正常運作嘅話，血入邊嘅氧需要維持係一個好特定嘅平衡。正常人嘅動脈血含氧量係 95 至 100%，如果係低過 90%，就屬於唔正常，叫做缺氧。低過 80% 嘅話就有機會影響器官嘅正常運作，包括腦同心，需要即時嘅處理。持續嘅缺氧有機會導致呼吸或者心跳驟停。氧療可以幫助病人回復正常嘅血含氧量水平。

血循環：紅色 = 含氧（動脈），藍色 = 脫氧（靜脈）

定義

血紅蛋白飽和度曲線

血含氧量量度血紅蛋白可以同氧結合嘅位之中，已經有氧嘅比例。喺低氧環境，大部份血紅蛋白都會脫氧，血含氧量會根據氧-血紅蛋白解離曲線（oxygen-hemoglobin dissociation curve）改變，喺氧分壓 >11 kPa 嘅時候會達到 100%。脈搏血氧計可以用飽氧血紅蛋白同不飽氧血紅蛋白唔同嘅吸光性質嚟度血含氧量。

生理

人體透過唞氣嗰陣呼吸作用嚟調節一個正常同穩定嘅血含氧量，透過呼吸系統，血紅蛋白喺肺度攞到氧氣，並帶去全身。身體嘅唔同部份對氧嘅需求並唔係一成不變，例如做緊運動或者住喺高嘅地方都會用多啲氧。一個血細胞如果帶住正常量嘅氧嘅話就叫做「飽和」（saturated）。血含氧量太高或者太低對身體都係唔好嘅。

量度

SaO₂（動脈血氧飽和度）低過 90%就係缺氧（可能由貧血導致），表徵係會發紺。喺其他嘅組織都可以測量血含氧量：

• 靜脈血氧飽和度（SvO₂）係度返翻去心臟嘅血紅蛋白入邊有幾多係飽氧，可以睇得出傳遞嘅氧夠唔夠啲組織用。SvO2正常係喺 60% 至 80% 之間，低咗即係身體唔夠氧。好多時係用緊人工心肺機嗰陣會度呢個數，可以畀灌注師知道病人要幾多氧。
• 組織氧飽和度（StO₂）可以用近紅外光譜儀量度。
• 外周血氧飽和度（SpO₂）係用脈搏血氧計量度後估算嘅血含氧量，可以用呢條式計：

${\ce {SpO_2}}={\frac {{\ce {HbO2}}}{{\ce {{HbO2}+Hb}}}}$

HbO₂係帶氧血紅蛋白，Hb係脫氧血紅蛋白。

脈搏血氧測量

脈搏血氧計

脈搏血氧測量係用嚟估算血含氧量嘅方法，呢個對SaO₂嘅估算就叫SpO₂（peripheral oxygen saturation）。脈搏血氧計有一個細夾，可以夾住身體，可以係手指、耳垂或者BB隻腳，然後將讀數傳去一部讀數機，部機會有發光同收光嘅部份，度吸咗幾多紅光同紅外光。帶氧同脫氧嘅血紅蛋白吸光率唔同，咁就計到血含氧量。

醫學

喺海平面嘅話正常血含氧量大約喺 96% 至 99% 之間，而且唔應該低過 94%，海拔 1600米嘅話應該都要有 92%。

SaO₂低過 90% 嘅話會導致缺氧，表現出嚟就係發紺，但係血含氧量唔直接發映組織嘅含氧量。血紅蛋白同氧嘅親和度會影響佢放幾多氧畀組織用。pH值低、體溫高、二氧化碳分壓高、2,3-DPG量高都會導致血紅蛋白同氧嘅親和度低，即係會放多啲氧畀組織用。相反就係親和度高，組織氧少。