裴茂

裴茂（粵拼：pui4 mau6；？—？），字巨光（geoi6 gwong1），河東聞喜人（而家山西聞喜），係東漢末年嘅官吏、將領，做官到尚書令。佢有五個仔，其中裴徽係八裴之一。對於日後出名嘅裴潛，佢唔多鍾意，因爲裴潛細時舉止唔夠文雅。

裴茂
東漢 官員、將領
活躍時期	193年～214年
老豆	裴曄
仔女	裴潛 裴儁 裴徽 裴輯 裴綰
遞啲名
字	巨光

裴茂出身自河東裴氏，係個世家大族。佢老豆係裴曄，佢係老豆嘅二仔，阿哥係裴羲。漢靈帝時（168年～190年），歷任縣令、郡守、尚書。

初平四年（193年）農曆六月，當時晝夜連落二十日大雨，發大水，又打凍風。皇帝派時任御史嘅裴茂去詔獄大赦，赦咗兩百幾罪輕嘅人。當中有啲人係畀李傕冤枉嘅，李傕驚裴茂放咗嗰啲人，上去表奏話裴茂私自放囚犯，懷疑有古怪，請朝廷收監佢。但係朝廷詔書話而家天災咁多，係要派使者廣佈恩澤，放人係符合天意。所以唔會問罪裴茂，並且講呢啲事以後咪再問。

建安二年（197年）農曆十月，時任謁者僕射嘅裴茂率領段煨等關中諸將去討伐李傕，遞年（198年）正月擊敗李傕，當年農曆四月斬殺李傕兼且誅夷三族。由於呢啲功績封入列侯，封做陽吉平侯。

建安十九年（214年）農曆三月，漢朝皇帝封曹操嘅魏公爵位喺諸侯王之上，改授金璽、赤紱、遠遊冠，由左中郎將楊宣、亭侯裴茂持節授印。

裴茂嘅子孫喺日後開枝散葉，河東裴氏嘅五大分支都出自佢。其中佢嘅大仔裴徽係西眷裴嘅始祖，而西眷裴日後又分化出洗馬裴、南來吳裴、中眷裴三支；佢嘅三仔裴輯係東眷裴嘅始祖。

攷

• 歐陽脩、宋祁。〈宰相世系表〉. 《《新唐書》》。
• 陳壽（著）；裴松之（注）。〈魏書：和常楊杜趙裴傳 — 裴潛傳〉. 《《三國志》》。｢〈魏略曰：潛世為著姓。父茂，仕靈帝時，歷縣令、郡守、尚書。建安初，以奉使率導關中諸將討李傕有功，封列侯。潛少不脩細行，由此為父所不禮。〉｣
• 陳壽（著）；裴松之（注）。〈魏書：武帝紀〉. 《《三國志》》。｢（建安）十九年……三月，天子使魏公位在諸侯王上，改授金璽，赤紱、遠遊冠。〈獻帝起居注曰：使左中郎將楊宣、亭侯裴茂持節、印授之。〉｣
• 范曄。〈孝獻帝紀〉. 《《後漢書》》。｢（初平）四年……六月……雨水。遣侍御史裴茂訊詔獄，原輕繫。……（建安）三年夏四月，遣謁者裴茂率中郎將段煨討李傕，夷三族。｣
• 范曄。〈董卓列傳〉. 《《後漢書》》。｢明年夏，大雨晝夜二十餘日，漂沒人庶，又風如冬時。帝使御史裴茂訊詔獄，原繫者二百餘人。其中有為傕所枉繫者，傕恐茂赦之，乃表奏茂擅出囚徒，疑有奸故，請收之。詔曰：『災異屢降，陰雨為害，使者銜命宣佈恩澤，原解輕微，庶合天心。欲釋冤結而復罪之乎！一切勿問。』……（建安）三年，使謁者僕射裴茂詔關中諸將段煨等討李傕，夷三族。｣