裴徽 (三國)
裴徽（粵拼：pui4 fai1；？—？），字文季（man4 gwai3），河東聞喜人（而家山西聞喜），係三國中曹魏嘅官員，係裴潛嘅細佬。佢係「八裴」之一，啲人將佢同「八王」中嘅王祥對比。
| 裴徽 | |
|---|---|
| 曹魏 官員 | |
| 仔女 | 裴黎 裴康 裴楷 裴綽 |
| 遞啲名 | |
| 字 | 文季 |
裴徽做官到冀州刺史，封得爵位蘭陵武公。佢有好高嘅才能，識睇嘢，尤其善於研究玄學，講得出箇中玄妙，同魏晉時代嘅玄學家、士人交往密切。傅嘏喺年少時就識得佢，後來荀粲同傅嘏傾玄學，由於傅嘏擅長於名理之學（名教），而荀粲推崇玄遠之理（自然），所以雖然佢哋都係探討玄學嘅學問，但講嘢時一急講唔多清，就會有誤會拗撬。裴徽對於佢哋兩家嘅諗法都通達瞭解，所以喺箇中調解，幫兩家疏通玄理意思，卒之令兩家明白對方講咩，結果喺裴徽嘅幫助之下，荀粲同傅嘏做咗老友。
魏晉時緊要嘅玄學家王弼喺佢少時拜訪過當時係吏部郎嘅裴徽，裴徽一見佢就知佢係叻人，用好難解嘅哲學問題問佢：「無，確實係萬物嘅根源，不過聖人唔肯就無本身論說，而老子不斷反覆申明佢，點解呢？」王弼答：「聖人以無係本體，但無係講唔清嘅，冇辦法直接講佢，所以唔講佢。而老子係以有（存在、現象）去論述無（本體），所以可以不斷去講嗰個不足以去論說嘅無。」[註 1]於是傅嘏亦都識得王弼呢個人。
除咗玄學家，裴徽亦同術士接觸過。管輅就喺趙孔曜嘅推薦下畀裴徽提拔做官，而且裴徽同管輅嘅關係重幾好添。
裴徽好早過世，留低四個仔，由大到細分別係裴黎、裴康、裴楷、裴綽，大仔做武將，三個細仔都係做官，兼且都係名士，其中裴楷嘅才望最高。
裴徽係河東裴氏一大分支西眷裴嘅始祖，因爲佢嘅子孫多數入仕西涼，所以稱爲西眷裴。喺日後西眷裴又分化出三個大分支，即係洗馬裴、南來吳裴、中眷裴，同西眷裴、東眷裴並列爲河東裴氏五大房支，所以實質上裴徽係五大房支中四支房支嘅始祖。
家庭
編輯註
編輯- ↑ 呢段話喺《世說新語》嘅版本係：「聖人體無，無又不可以訓，故言必及有。老、莊未免於有，恆訓其所不足。」意思：「聖人以無爲本體，但無又冇辦法直接講佢點，所以講親『無』必然要講『有』。老子、莊子冇辦法免去呢個『有』，所以要經常解釋嗰個未充分掌握到嘅『無』。」所謂「有無相生」，有同無構成咗循環關係，要講有，必然要講到無；要講無，就必然透過有去講。王弼嘅哲學思想係以無爲本，因爲無係本體，而有係現象。想知多啲嘅讀者，可以去讀海德格爾《存在與時間》呢本哲學書，現代西方嘅存在哲學同魏晉玄學講到嘅形而上學有相通之處，另外想瞭解中國哲學史，可以試下去讀馮友蘭《中國哲學簡史》，入便講到新道家（玄學）嘅思想史。
參攷資料
編輯- 陳壽（著）；裴松之（注）。〈魏書 — 和常楊杜趙裴傳：裴潛傳〉. 《《三國志》》。｢潛少弟徽，字文季，冀州刺史。有高才遠度，善言玄妙。事見荀粲、傅嘏、王弼、管輅諸傳。徽長子黎，字伯宗，一名演，游擊將軍。次康，字仲豫，太子左衛率。次楷，字叔則，侍中中書令、光祿大夫、開府。次綽，字季舒，黃門侍郎，早卒，追贈長水校尉。康、楷、綽皆為名士，而楷才望最重。｣
- 何劭。〈荀粲傳〉. 《《荀粲傳》》。｢太和初，到京邑與傅嘏談。嘏善名理而粲尚玄遠，宗致雖同，倉卒時或有格而不相得意。裴徽通彼我之懷，為二家騎驛，頃之，粲與嘏善。｣
- 陳壽（著）；裴松之（注）。〈魏書 — 荀彧荀攸賈詡傳：荀彧傳〉. 《《三國志》》。｢太和初，到京邑與傅嘏談。嘏善名理而粲尚玄遠，宗致雖同，倉卒時或有格而不相得意。裴徽通彼我之懷，為二家騎驛，頃之，粲與嘏善。｣
- 陳壽（著）；裴松之（注）。〈魏書 — 王衛二劉傅傳：傅嘏傳〉. 《《三國志》》。｢嘏自少與冀州刺史斐徽、散騎常侍荀甝善，徽、甝早亡。｣
- 陳壽（著）；裴松之（注）。〈魏書 — 王毌丘諸葛鄧鍾傳：鍾會傳〉. 《《三國志》》。｢時裴徽為吏部郎，弼未弱冠，往造焉。徽一見而異之，問弼曰：『夫無者誠萬物之所資也，然聖人莫肯致言，而老子申之無已者何？』弼曰：『聖人體無，無又不可以訓，故不說也。老子是有者也，故恆言無所不足。』尋亦為傅嘏所知。｣
- 陳壽（著）；裴松之（注）。〈魏書 — 方技傳：管輅傳〉. 《《三國志》》。｢安平趙孔曜薦輅於冀州刺史裴徽曰：『輅雅性寬大，與世無忌，仰觀天文則同妙甘公、石申，俯覽周易則齊思季主。今明使君方垂神幽藪，留精九皋，輅宜蒙陰和之應，得及羽儀之時。』徽於是闢為文學從事，引與相見，大善友之。｣
- 劉義慶。〈品藻〉. 《《世說新語》》。｢正始中，人士比論……又以八裴方八王：裴徽方王祥，裴楷方王夷甫，裴康方王綏，裴綽方王澄，裴瓚方王敦，裴遐方王導，裴頠方王戎，裴邈方王玄。｣
- 歐陽脩、宋祁。〈宰相世系表〉. 《《新唐書》》。｢西眷裴出自陽吉平侯茂長子徽，字文秀，魏冀州刺史、蘭陵武公，以其子孫多仕西涼者，故號西眷。｣