複製保護

複製保護（copy protection）喺軟件工程上係指為咗防止啲人用翻版而喺隻軟件入面落嘅一啲措施。複製保護係頗具爭議性，被認為係令畀錢買正版嘅用家帶來不便，甚至試過整壞畀錢用家嘅資料，反而真係用翻版嘅人因為用嘅係｢拆｣（crack）咗嘅版本，根本唔會受到複製保護影響。

源碼嘅複製保護可能會用到代碼難讀化；二進制格式嘅一般用家用嘅軟件就可能會加密，亦好多時會同硬件有關嘅。

做法編輯

複製保護嘅例子包括：

目前常見嘅方法係強制網上簽到，唔簽到就用唔到，爾ni種方法被指喺高度設防嘅公司、機構或者政府部門等等唔准上網（或者直情封咗網）嘅地方根本冇可能用，如果軟件間中要重新簽到亦有指會引致做嘢途中軟件突然失效；Adobe Creative Cloud 同新版嘅 Microsoft 365 都係用爾種方法
有啲軟件會嵌入使用條款，行嘅時候測cek1到唔啱條款就唔畀用，但係如果格式轉咗亦可能會讀錯條款，或者冇限制誤判做唔准用；有啲專業用嘅字款會用爾種方法
有啲軟件會記低主版、乙太網卡或者其他硬件嘅一啲不明資料，寫入不明檔案或者硬碟上面嘅不明位置，可能有加密，每次開個程式都會核對資料有冇變，有變就用唔到，亦即係如果部機壞咗拎去修理，換咗主版，套軟件就可能報廢；微軟視窗同早期嘅 Adobe Creative Suite 都用過咁嘅方法
以前曾經流行要插件細嘢（叫 dongledong1 gou4）落部電腦先用到軟件，冇 dongle 就用唔到，件嘢壞咗或者唔見咗亦都用唔到；QuarkXPress 就曾經用過咁嘅方法^[1]
喺可以用唔標準方法讀寫儲存媒體嘅系統，有啲公司會揀用唔正常嘅方法錄個程式或者重要資料；以前 Apple II 嘅遊戲好多時都用唔標準嘅方法錄張磁碟，用正常嘅作業系統會以為張碟壞咗，但係就咁boot起就乜事都冇，甚至用特製嘅磁碟複製軟件都未必抄到

↑ nobleach (2014年3月7號). "As a Graphic Design major at the end of the 90's, I had to learn to eat, sleep and breathe Quark" (回覆 How QuarkXPress became a mere afterthought in publishing). Y Combinator (英文). 喺2023年6月13號搵到.