西灣國殤紀念墳場
西灣國殤紀念墳場（Sai Wan War Cemetery）係香港一個墳場，喺柴灣哥連臣角道，主要安葬第二次世界大戰時喺香港陣亡嘅盟軍士兵同被俘後死亡嘅人士，墳場內亦葬有本地嘅抗戰軍人同平民，依家由英聯邦戰爭公墓委員會 (Commonwealth War Graves Commission)管理。
西灣國殤紀念墳場喺1953年起好，由奧基斯（C. St. Clair Oakes）設計，內有西灣紀念碑，碑上刻有「THEIR NAME LIVETH FOR EVERMORE」。
墳場嘅主要建築物嘅入口有一把十字劍、「1939」同「1945」字樣，背面裝嵌住並列出喺同時期殉難而唔知葬喺邊嘅軍人嘅名，共2,071個，當中包括1,319人嚟自英國軍隊、228人嚟自加拿大軍隊、287人嚟自印度軍隊及237人嚟自香港嘅軍隊。另外，鑲有兩塊特別嘅碑石，其中一塊載有144名被火化嘅印度教及錫克教軍人嘅名；另一塊就載有72名喺兩次大戰喺中國捐軀嘅英聯邦軍人嘅名，佢哋嘅墳墓而家已經唔喺度。
墳場裏面共有1,578穴墳墓，葬有59名海軍、1,406名陸軍、67名空軍、18名商船隊隊員、20名香港本地抗戰軍人及8名平民，國籍包括1,013名英國人、283名加拿大人、104名印度人、33名澳洲人、1名新西蘭人、1名緬甸人、53名香港人、72名荷蘭人同18名其他國籍人士。
出面網頁
編輯