豆腐渣工程

豆腐渣工程係指建築工程入面偷工減料導致相關建築物倒塌或唔符合規定，字詞經常喺中國場景出現。字詞最早喺1998年出現，但作為中國嘅社會問題，去到2020年代仍然未有解決，繼續做成人命傷亡。

名字由來

呢個字詞最早出自中華人民共和國前總理朱鎔基嘅口中。 1998年夏季中國發生特大洪水，朱鎔基喺視察發生潰堤嘅九江市時候，首先問及九江決口嘅防洪牆問題，朱鎔基怒斥呢個係「豆腐渣工程」。

後來中國大陸各地接連被揭發多處因為有關人士貪污腐敗而唔合規定或發生意外嘅建築，「豆腐渣工程」一詞就經常出現喺各大媒體。因豆腐渣係一種軟爛易塌嘅食物，故以此嚟比喻。

成因

豆腐渣工程嘅成因，除咗刻意嘅偷工減料外，也可能因為外行人士擔當建築師、工程師，對品質管理、力學都唔認識，把關唔夠嚴格，唔達標準。豆腐渣工程嘅後果通常係負責人被問責或炒魷魚。

例子

• 1998年2月20號上午，湖北巴東縣焦家灣，正在施工嘅大橋突然坍塌，11人當場死亡
• 1999年1月4號，重慶綦江彩虹橋起好咗短短三年，就整體坍塌，40人死於非命
• 雲南省耗資3.8億人民幣修建嘅昆祿公路，開通18天，就路基沉陷、路面開裂
• 海南高速公路十字路出口到東山湖野生動植物園，旅遊專線通車11天就出現損壞
• 2003年3月，廣東省信宜市嘅石崗嘴大橋主體工程啱啱完工，仲未裝修就突然坍塌。
• 江蘇省徐州市濟眾橋改建工程耗資760多萬人民幣，本來定喺2004年6月28號舉行剪彩儀式，但就喺前一日倒塌。
• 2005年歲末，浙江省金華市一名市民喺雙龍大橋嘅人行道散步，腳下蓋板突然脫落，墜落喺橋下約20米乾涸河床，當場死亡。
• 2021年5月，浙江紹興市杭紹臺高速公路嘅一座即將完工嘅橋樑倒塌，橋面掉入河裡面。
• 2022年4月，湖南長沙一幢六層樓喺無預警嘅情況下倒塌，多人被埋。