葉繼歡

葉繼歡（粵拼：jip6 gai3 fun1，1961年6月12號—2017年4月19號），係香港罪犯，外號大賊、賊王，曾經喺赤柱監獄坐過監。

佢響廣東汕尾市海豐出世，17歲偷渡去香港。

佢涉嫌1984年連環持械行劫案，尖沙嘴景福金行及中環置地迪生表行。然而由於證據不足，葉行劫罪唔成立，但處理贓物同無牌管有槍械罪成，被判囚18年，上訴後減刑至20年。

1989年8月4號，葉繼歡於赤柱監獄服刑期間訛稱肚痛，被押去瑪麗醫院檢查，其間借機逃脫。

葉繼歡匿藏兩年後，於1991年6月涉嫌同同黨打劫觀塘物華街5間金行，葉手持AK-47突擊步槍同警察駁火，掠奪價值1,000萬港元嘅金飾。1992年3月7號，葉繼歡再涉嫌糾黨打劫彌敦道謝瑞麟金行，同警察駁火12響，再掠100萬元金飾。3日後，佢再涉嫌同7名同黨持兩支AK-47同多支手槍打劫大埔道兩間金行，共搶得700幾萬元金飾，並向警察開60幾槍，更挾持人質，又向救護車開槍，導致3人受傷。葉被列為頭號通緝犯，懸紅100萬元通緝佢歸案。然而，葉繼歡從未被控涉及呢幾單持械行劫案。

1996年5月13號，葉繼歡同兩個同黨帶住大批槍械同埋三硝基甲苯潛逃回港於西環登岸，因上岸途中遇上軍裝巡邏小隊警員，警員見佢形跡可疑，上前查問，未幾葉繼歡急步向船跑去，隨後爆發槍戰，葉繼歡下身中彈就擒，從此下身不遂。1997年葉繼歡被判逃離合法羈押、無牌管有槍械及彈藥、使用槍械及彈藥意圖抗拒合法逮捕、意圖危害生命或財產而管有爆炸品罪名成立，共判監30年，連同1989年逃獄前未服完嘅刑期合共要服刑41年零3個月。1999年上訴庭改判佢入獄36年零3個月。其後佢再向終審法院就申請上訴許可，指上訴法庭判刑時未有考慮佢喺槍戰中受重傷導致永久傷殘，要求進一步減刑，但遭到駁回。

葉繼歡等唔到放監，2017年4月19號因為癌病晚期死咗，終年55歲。