越南水上木偶戲

越南水木偶戲（越南文：Múa rối nước／𦨂𦇒渃）係越南一種傳統文藝表演，有大概一千年歷史，表演方式係喺水池上搭起舞台，由隱藏喺後台嘅演員用長線或者竹竿操縱木偶，令到木偶演出各式各樣嘅動作同戲份。除咗操縱木偶嘅演員之外，仲會有樂隊參與演出。使用嘅樂器包括大鼓（為主要樂器，鼓聲緩急同劇情有密切關係，如果喺劇中高潮時，鼓聲會變得密集。鼓聲亦可以係演出開始同結束嘅信號）、響板、嗩吶、銅鑼、笛、簫、揚琴、胡琴、獨弦琴、鈴鼓、鐃鈸等。樂隊嘅隊員亦會不時擔任旁白、配音同歌手，以襯托劇情。