越南文化

越南文化（粵拼：jyut6 naam4 man4 faa3；越南文：文化越南Văn hóa Việt Nam）有以下三種定義：

1. 狹義：指越南主體民族京族嘅文化，呢個角度講嘅越南文化史係指京族嘅文明史。
2. 廣義：廣義越南文化係指住落喺越南版圖嘅越南各族嘅全部文化，呢個角度係指越南所有民族佢哋自身嘅民族文化，但唔係政治意義上嘅國族文化。對於跨國民族，佢哋嘅民族文化會同時係若干所在國家嘅文化。
3. 共同體定義：以上兩項定義係民族學、人類學概念，共同體定義係政治概念，亦即越南國族文化，呢個國族文化係指喺各民族多樣嘅文化色彩嘅基礎上，形成統一嘅越南民族文化。國族概念係指呢個主權國當中，佢嘅公民由於多項要素令佢哋凝聚成一個民族。共同體定義係家下喺越南文化領域嘅各家研究者、當局管理者嘅主流定義，因此比較多嘅學術資料、官方資料中，講起越南文化，係指越南國族文化。

相度一啲越南文化特色：入邊嘅越南女人着住四身襖或者越南旗袍，除低嘅頭笠放喺地下，佢哋彈住嘅樂器有獨弦琴、三十六弦琴、日琴（四弦琴）、竹琴。牆上掛住月琴、琵琶、越南二胡，重有四幅素女幀嘅畫。

越南文化 系列文章
順化古城
越南文化介紹    民族    風俗    節慶    信仰    宗敎    語文    文學    藝術    飲食    服飾    武術    遺產 越南地方文化    西北文化    東北文化    北部平原    中北部文化    中南部文化    西原文化    東南部文化    西南部文化

北寧一班用傳統樂器演奏節慶樂曲嘅老人家

就越南文化史睇，佢係東南亞最古老嘅文化之一，一般認為：青銅時代嘅東山文化係佢嘅文化前身。之後畀中國總共一千年左右嘅統治，越南無論政治、思想、文藝，都深受中國文化嘅影響，佢至今分享中華文化遺產，所以係漢字文化圈一員。10世紀時越南從中國獨立，之後南進，陸續吞併而家越南中部嘅占婆國、南部原屬真臘嘅領土，於是越南文化多咗呢兩個地方嘅異質來源。而同處中南半島嘅其他國家，更多畀印度文化影響。

法國殖民地時期，越南文化受歐洲影響，比如傳入天主教、推廣拉丁字越南文。而越南文原先係用源自中國嘅唐字，再加上自己創製嘅喃字撈埋來寫，其中源自中文嘅詞用漢字，而固有詞有啲用喃字寫，有啲用漢字記音、或者訓讀。呢套文字叫做漢喃，係同中文一樣嘅意音文字，同粵文類似，一字一音噉寫低啲話。而拉丁字叫做國語字，係根據串法，一音一組字母分隔來記。

還劍湖度着越南旗袍嘅後生女

社會主義時期，越南文化深受政府控制嘅傳媒、社會主義宣傳影響。冷戰時，越南民主共和國係第二世界成員，所以同反共主義陣營嘅文化交流少，外國文化嘅流入，比較多係蘇聯、新中國、古巴呢啲陣營入便嘅同路人。

1990年代後，越南開始向其他亞歐美嘅國家開放，同外國文化交流比較多樣。但總體嚟講，越南文化基調係東亞文化分支，比如祖先崇拜、家國觀念、大乘佛教同儒家思想嘅主流地位等等。

睇埋

• 嶺南文化