逆權侵佔
逆權侵佔（英文：adverse possession）係普通法概念，指地產，非業主唔經原業主同意，長年佔用對方土地，一超過法定時限，原業主興訟時限就終止，該佔用者，可以成爲笪地合法新業主，唔使付出任何代價。
敵意佔有
編輯逆權侵佔要符合「敵意佔有」（hostile）嘅要素。佔有者不單止要持續並實質佔有有關土地，而且重要顯示佢敵意佔有嘅意圖，例如整個門鎖、圍欄、門牌、人為耕作等。如果土地使有者相信原業主容許他合法進入該地（例如租用），咁佔有意圖就唔成立。如果不完全符合「敵意佔有」嘅條件，例如聲稱打算交租但長年搵唔到人交租嘅情況，就唔可以以逆權侵佔理由成為該土地嘅合法業主。
善意同惡意
編輯一啲普通法地區唔容許惡意佔有人（malice）以逆權侵佔為由成為新業主。所謂「惡意佔有」，係指佔有者應該知道有關土地已經俾人敵意佔有（即係睇見人哋整咗個門鎖、圍欄、門牌、或掛起「閒人免進」等），不論喺妄顧呢啲事實，又或者毀壞或移除呢啲標記，仍然長期佔有該地。
喺呢啲司法區，並非惡意而敵意佔有人仍然合符逆權侵佔嘅要素（例如買錯屋住錯屋嘅情況），佢仍然可以用呢條法律成為合法新業主。
一啲司法區要求敵意佔有人證明佢有善意，否則逆權侵佔無效。所謂善意包括：
- 交土地稅，同作為房地產擁有人要交嘅稅；或
- 其他行為顯示，佔有人真係相信有權佔用嗰個地方（right to claim）
道德理由
編輯因為土地擁有權興訟時效係有限嘅，所以先有「逆權侵佔」。呢個興訟時效一般係12年，而呢個時效可以由明文法指定或改變。
如果興訟時效係無限制嘅話，咁任何土地擁有人都無法安心，因為任何土地可能喺幾百或甚至千幾年前，都有佢嘅合法擁有者，佢哋後人都可以告個現有土地擁有人，現有土地擁有人，就要面對無窮無盡嘅法律風險，咁會危害到私有產權嘅穩定性。
呢個理由，同其他普通法訴訟有限興訟時效，係一致嘅。
應用於領土紛爭
編輯因為興訟時效限制適用於私人土地紛訟，咁興訟時效限制適用於處理領土紛爭亦理所當然。
喺國際法，任何國家若確信佢國土畀人敵意佔有，就有責任提出正式抗議（唔使告人，但抗議要備案）。若然超過咗時限，都無抗議或告人哋，國際法就唔可以話該佔有係非法，佔有國就自然成為合法擁有者。
案例
編輯香港
編輯根據香港1945年成文法《時效條例》第347章，第7條及第17條，任何人士（包括惡意佔有者）無間斷佔用官地60年，香港政府就會冇咗嗰塊官地嘅追索權。 [1]
- 一對母女持續佔用大埔一幅萬呎農地超過20年，高院判兩人得到該地段業權，恒基地產唔服氣。（見〈逆權侵佔案 恒基或可取回大埔農地〉，載香港《明報》，2005年2月23日。）
- 香港終審法院第一個判決 FACV1/1997 中確定，Wong Tak Yue 因為只係話搵唔到註冊業主，先去無交租佔用元朗洪水穚一址，但因為佢在畀法院嘅誓章中表示佢有意交租，所以佢佔據嘅意圖唔成立，「逆權侵佔」亦都唔成立。
出面網頁
編輯- 香港成文法《時效條例》第347章
- 2006年10月24日，成報: 恒基地產向高院申請司法覆核，爭一幅農地，指「逆權侵佔」有違《香港基本法》，是剝奪原業主的財產，要求撤銷根據《時效條例》第347章的原判決。 (案件編號：HCAL32/2006)
八旬村婦獲終審法院 裁定以逆權侵佔，從業主恒基地產 手中獲得12萬方呎大埔 滘松園農地的業權