房地產

房地產（粵拼：fong4 dei6 caan2；英文：real estate），或者就噉簡稱地產，係財產嘅一種。一棟房地產會包含

• 一笪土地、
• 笪土地上面嘅建築物（例如一間住屋）、加埋
• 笪地有嘅天然資源（好似係水同泥土呀噉）。

2018 年澳洲維多利亞州嘅一間屋；間屋、笪地同埋笪地有嘅天然資源加埋嘅總體就係一棟房地產。

一棟房地產唔會包含笪地上面嘅動產（personal property）：動產包括啲「郁得」嘅財產，即係件財產郁咗都唔會有損佢嘅價值，好似一個人啲傢俬或者汽車都係佢嘅動產，而相比之下，一笪土地或者一間屋（簡化噉講）唔郁得，或者郁咗就會明顯影響佢嘅價值；因為房地產唔包動產，就算一個人（例如）將佢啲傢俬擺喺佢擁有嘅屋裏面，啲傢俬都唔算係棟房地產嘅一部份。

自從廿世紀中起，房地產就一路都畀人視為一種有用嘅投資：由於通脹等嘅現象，有返咁上下識理財嘅人都會想攞自己嘅儲蓄買啲有升值潛力嘅財產，而唔係齋一味將啲錢儲住；事實亦表明，房地產有升值潛力，買咗仲可以攞嚟住，所以好多人以至企業都會買房地產嚟做一種投資，甚至買咗啲房地產之後唔住喺入面。據估計，喺 2020 年代初嘅美國，房地產市場嘅總值去到過萬億美金咁多。

因為房地產咁重要，房地產嘅相關課題自然引起咗唔少經濟學同金融學工作者嘅關注。呢啲工作者會剖析房地產市場嘅運作，想解答「要點樣預測房地產市場嘅變動」同埋「要用乜政策先可以有效噉管控房地產市場」等嘅問題。

法律定義

2017 年美國南卡羅萊納州嘅一棟住宅

正路嚟講，一個國家或者地區嘅法律會對房地產呢隻詞（或者隻詞喺第啲語言入面嘅對應）作出定義。喺 2022 年，美國紐約州嘅康奈爾法律學院（Cornell Law School）係噉定義房地產呢隻詞嘅：

「

原版英文："Real estate is a piece of land, including any artificial or natural property permanently attached to it, above or beneath, such as a house, a building, a tree, or minerals. Personal property like vehicles is not part of real estate." 粵文翻譯：房地產係（指）一笪土地，包埋任何永久噉結附喺笪土地上邊或者下邊嘅人造或者自然財產，例如係一棟住宅、一棟建築物、一樖樹或者礦物質。好似交通工具等嘅動產唔係房地產嘅一部份。

」

動產（personal property / movable property）泛指啲「郁得」嘅財產，相對於不動產（immovable property）：

• 好似土地、建築物、樹、泥土蘊含嘅礦物質或者井等嘅財產都係「正常情況下唔郁得」嘅，或者郁咗就會明顯噉影響佢哋嘅價值，例如一笪地位置近垃圾堆填區，住喺笪地嘅人成日都會受垃圾嘅臭味侵擾，少人想買笪地（需求低），通常就會搞到笪地嘅價低；如果家陣有位魔法師，佢施展魔法將笪地變去一個離垃圾堆填區遠嘅地方，正路就會令笪地嘅價升－笪地郁咗，佢嘅價值就明顯改變；呢啲「唔郁得」嘅財產就係不動產。
• 好似傢俬、交通工具（包括私家車同電單車等）或者個人電腦呢啲「郁得」嘅物品，都算係動產。房地產正常嚟講唔包動產－噉亦即係話，想像有個人因為想移民而賣咗自己棟房地產，法律上佢只係賣緊佢笪地同笪地上面嗰間屋，間屋入面啲傢俬依然係屬於佢嘅（除非佢做買賣嗰陣，講明將啲傢俬賣埋俾對方）；正路嚟講，佢頂攏淨係有義務要喺限時內將啲傢俬搬走。

睇埋

• 睇屋
• 裝修
• 室內設計
• 建築施工

拎

• Different ways to invest in real estate. Investopedia.
• Real Estate. Investopedia.
• Save Your Money And Buy A Home When The Real Estate Market Cools, Forbes.