進行式

進行式（粵音：zeon3 hang4 sik1）係語法上嘅一種時態（或者精確啲講係文法體），表示一啲進行緊嘅動作。

粵語裏面，進行時態係響動詞後面加個「緊」字來表示嘅。例如：「食緊飯」「睇緊報紙」。

普通話嘅進行時態，係響動詞前面加「正在」或者「在」來表示。例如：「正在食飯」「我在看報紙」。

英文裏面，進行時態要用動詞嘅現在分詞（-ing 形），配合輔助動詞 be 來表示。因為英文裏面時態唔能夠獨立表達，所以輔助動詞 be 同時要按時式來變形，比較複雜。例如：「I am eating.」係現在式進行態，「I was reading newspaper.」係過去式進行態，「I will be sleeping.」係將來式進行態，……

法文嘅進行時態，用輔助動詞 être 加「en train de」再加動詞嘅原形來表示。同英文一樣，法文裏面時態唔能夠獨立表達，要配合時式用輔助動詞être嘅適當變形。好似：「Je suis en train de manger.」係現在式進行態，「Ils seront en train de lire le journal.」係將來式進行態，……

德文正式來講比較少用進行時態，但係有必要時，又或者係方言裏面，會用用輔助動詞 sein 加「am」再加由動詞轉化成嘅名詞來表示。同英文一樣，德文裏面時態唔能夠獨立表達，要配合時式將輔助動詞 sein 變形。好似：「Ich bin am Essen.」係現在式進行態，「Sie waren am Lesen der Zeitung.」係過去式進行態，……

總之，唔同語言有唔同嘅方式來表達進行時態，有啲唔可以單獨表達時態，而係要撈埋時式一齊表達先致得。