適應系統

適應系統（英文：adaptive system）係指有能力對環境改變俾反應嘅系統。

概論

睇埋：複雜系統

一個適應系統係個系統，有一大拃組成部份，當中是但一對組成部份之間嘅關係出現變化，都可以令個系統嘅整體行為唔同咗，而且好多時啲組成部份又有返咁上下複雜，每件都曉或多或少噉改變自己或者做決策（細胞同人都係噉）嚟適應環境；如此者，個系統整體就有能力隨時間（當中時間係個連續變數）改變自己嘅行為。

舉幾個例說明：

• 體内平衡
• 學習：一隻動物全身包括個腦（一個複雜系統）由好多粒細胞（組成部份）組成，每粒細胞都有能力或多或少噉改變自己，從而令隻動物嘅行為出現變化；例如擺隻動物喺間實驗室入面，實驗室地板上有個紅色掣，佢每次撳個紅色掣，都會有嘢食（睇埋斯金納箱嘅概念），經驗表明，隻動物個腦入面啲神經細胞之間嘅連繫會變，感受肚餓嘅腦細胞同「控制隻動物啲肌肉去撳掣」嘅細胞建立咗連繫（組成部份之間嘅關係唔同咗），令隻動物話咁快學識由唔撳掣變成每次肚餓都去撳個紅色掣（個系統嘅行為唔同咗）。可以睇埋生物神經網絡同埋海伯理論。
• 組織學習：管理學上有所謂嘅組織學習現象；組織係泛指一大班人一齊為咗某個目標做嘢，例如一間企業（一個複雜系統）啲員工（組成部份）一齊合作做嘢，想間企業起碼唔好執笠，保住自己嘅生計；想像家陣間企業係從事建築工程相關事務嘅，有日佢哋幾個管理層去出席建築工程方面嘅研討會，佢哋學識一隻新嘅建築技術（其中一啲組成部份變咗），隻技術能夠令起屋要花嘅時間下降 30% 同時間屋嘅質素唔跌，於是佢哋返去開會決定對隻技術做研發（組成部份做決策），最後令間企業嘅行為出現變化－間企業用嘅技術唔同咗，而且仲為咗研發呢隻新技術而（例如）同某大學嘅工程學院建立合作關係（個系統嘅行為唔同咗）。

... 呀噉。

睇埋

• 學習
• 創新
• 複雜適應系統