部份準備金

喺廿一世紀嘅經濟體裏面，銀行一般都會運用部份準備金（英文：fractional-reserve banking）嘅做法提升經濟體嘅貨幣供應。

噉講意思即係話，銀行喺得到啲人想儲入佢哋度嘅錢之後，會淨係留起一部份－以現金同市場流動性高嘅資產嘅型式－做儲備，等人用得到活期存款^[1]。

唔係留嚟做儲備嗰啲錢，銀行就會攞嚟借俾人。噉做嘅話銀行可以靠啲人還錢嗰陣俾嘅利息嚟賺取利潤，而且對個經濟體嚟講，噉做會變相令個經濟體多咗錢流動，創造更多嘅經濟活動。