郭信一

郭信一（綽號： 黑人；性別：男）乃台灣黑道中人，在世時做過黑人家族嘅首領，活躍於桃園市／桃園縣。

崛起

郭信一響混跡江湖初期，跟隨過小南門幫嘅黃建偉，到左1990年代依靠南門市場發跡，以作風兇狠見稱，後來自立門户，勢力迅速壯大；後生時狂妄到連某「民意代表（台灣定義）」個仔幫某偵查隊隊長都敢威脅，甚至有傳聞指佢試過揸槍掃射某派出所。

浮沉

「蕭新財殺警案」響2000年9月1號發生，由於其兇器霰彈槍係郭信一借出嘅，佢入獄收場，亦被傳媒叫作「黑道軍火庫」；坐監期間，仲利用書信幫探監等通訊渠道，指揮外面嘅鄭宇峰等手下犯罪、營商幫參政，又揾人偽造文件試圖逃避審訊。出獄後，郭信一帶着班夥計，以吉昌街為據點，大搞賭檔（涉及詐騙）、放貴利幫暴力收數等勾當；佢因此響2015年5月11號被拘捕，隨後入埋冊；重獲自由後低調生活，避免涉足黑社會嘅紛爭。

響2019年6月12號，「明士車行人質挾持案」發生，郭信一應歹徒林佑儒幫桃園市政府警察局刑事警察大隊偵查第一隊小隊長洪俊德嘅要求，先撥輪後到場噉協助斡旋，令危機妥善解除（冇人死傷）。「黃明誠綁票案（似乎係蠱惑仔之間嘅追債）」發生於2021年2月6號，有傳言話綁匪肯放人之原因（贖金畀唔足），係肉參嘅家人委託咗郭信一去講數。

殞落

郭信一響2023年1月2號喺泰昌十街同吉昌街路口被刺殺，中槍身亡，終年55歲；兇手未落網。