關白
歷史
編輯關白一字由中國傳入日本，出自霍光。因為響漢宣帝時期，霍光好有權力，所以咩嘢事都要話畀先，呢件事就紀錄響《漢書》一句「諸事皆先關白光，然後奏天子」，後嚟為咗避諱，所以又叫博陸。
大約響880年至887年之間，由藤原北家成員基經創立關白一位，並就任做關白。之後因為藤原氏坐大，權力大到架空咗天皇，所以關白就做咗最高官位，而且關白一位仲要係藤原北家嘅人先至做得，久而久之就變成世襲官位。而同時仲有另一個官位升咗上嚟，嗰個就係攝政，所以佢同關白合稱為「攝關」。
1131年，忠通繼承關白一位，19年後近衛天皇提出要忠通將關白傳畀細佬賴長（因為前任關白、即忠通同賴長個老豆忠實生前好鍾意賴長，而賴長又好叻仔），但係忠通就一口拒絕，呢年決定唔單止激嬲咗天皇，仲激嬲埋藤原北家一班老臣子，結果就響1156年爆發保元之亂。雖然最後賴長畀人殺死，但呢件事導致藤原北家分裂，分咗近衛家、松殿家、九條家三家，而且後嚟呢件事導致平清盛成功「上位」，藤原北家徹底分裂。
後嚟關白九條忠家規定，關白一位由五攝家輪流做。