陳偉強係香港親中派同政治人物學者,而家喺理工香港專上學院社會科學、人文及設計學部擔任講師,主要教授當代中國科目,曾經喺2008年至2015年間擔仼油尖旺區民選議員(富柏選區)[1][2]

學歷同教學經歷

佢喺香港浸會大學香港中文大學,分別攞到歷史學學士學位同哲學碩士學位。佢亦曾經喺香港中文大學、倫敦大學同埋香港公開大學執教[3]

政治立場同爭議

佢係香港親中派嘅一員,亦因為政治立場衍生咗一啲爭議。

自稱政治聯繫嘅爭議

佢本身屬於經民聯西九新動力,但喺在任區議員期間,就喺區議會網站話自己係獨立[4]

2013年海富街市風波被指出賣居民

2013年,領匯宣布收回海富街市,當時引起咗唔少風波,有商戶形容喺租約問題上被領匯欺騙,而呢個計劃亦令到當區居民要買餸嘅話,就要去到比較遠嘅大角咀同旺角街市[5]。亦有商戶尋求當區區議員嘅陳偉強幫忙[6],但陳偉強就被批評潛水,而當時協助商戶嘅余德寶,去到1年半後接受訪問嘅時候,亦批評陳偉強有出賣居民之嫌[4]

因為人身攻擊學生被暫停教學

2019年10月,政府強行推《禁蒙面法》,包括高等教育界在內,社會一向有強烈聲音反對立法。但陳偉強批評有關規例刑罰過輕,認為要用暴動罪重判爭取民主嘅示威者,言論引起學生不滿。喺10月8號,佢同學生理論,結果被包圍指罵。佢當時自己冇出聲講嘢,但之後聲稱自己被「非法禁錮」,又形容學生做「暴徒」。之後,香港專上學院嘅學生會會見校方代表,批評陳偉強昨日言辭失當兼中傷學生,唔配教書,又質疑陳唔能夠持平對待唔同政見嘅學生。校方之後表示,基於學生學習利益,嗰個學期會先暫停陳嘅課堂教學。而院長亦表明,唔會用報道形容當時現場嘅學生[1][2]

參考

  1. 1.0 1.1 胡家欣 (2019-10-09). "【禁蒙面法】理工專上學院講師斥學生「暴徒」惹衝突 被暫停教學". 香港01 (中文). 喺2021-06-17搵到.
  2. 2.0 2.1 "【抗暴之戰】Poly講師盲撐暴動罪促重判抗爭者 學生sit堂促道歉嚇到阿Sir報警 | 蘋果日報". Apple Daily 蘋果日報 (中文). 喺2021-06-17搵到.
  3. "PolyU HKCC - 社會科學、人文及設計學部". www.hkcc-polyu.edu.hk. 喺2021-06-17搵到.
  4. 4.0 4.1 "【地區政治系列】公民黨余德寶:對抗蛇齋餅糭外,還有法團...... | 獨媒報導". 獨立媒體. 2015-01-29. 喺2021-06-17搵到.
  5. "領匯假談判 海富街市商戶續抗爭 | 何思穎". 獨立媒體. 2013-08-07. 喺2021-06-18搵到.
  6. "領匯迫遷海富街市商戶 西九新動力區議員潛水 | 何思穎". 獨立媒體. 2013-07-13. 喺2021-06-18搵到.