西九新動力

西九新動力（粵拼：sai1 gau2 san1 dung6 lik6），係喺2008年3月16號由當時做區議員嘅梁美芬召開嘅地區團體，而家喺香港立法會有一個議席。

雖然名義上係由佢召開，但好多人都認為係中聯辦為佢參選立法會做嘅準備。入面為數唔少嘅會員都係來自另一個左派團體九龍社團聯會，所以都似係九社聯拆出嚟嘅分支。呢兩點都令人認定呢個組織係建制派嘅一員。另外，有唔少成員同時係商界親中派政黨經民聯嘅成員。

唔少本身屬呢個組織嘅政治人，喺在任區議員期間或者進行地區工作嗰陣，喺區議會網站等唔同地方聲稱自己係「獨立」或者唔披露自己嘅政治聯繫，被部分親泛民媒體形容為「隱形建制派」。曾經被指控嘅包括陳偉強、葉志偉、許德亮、黃建新、仇振輝、張永森、楊永杰同鄭利明等等^[1]^[2]。

曾經有傳聞指出，梁美芬想撮合專業會議與西九新動力結成政黨，不過冇下文，去到第5屆香港立法會選舉後，專業會議同經濟動力等人組成經民聯，唔少西九新動力嘅成員亦都逐步跟住梁美芬加入經民聯，可算係落實咗當年嘅建議。

區議員資料

2012-2015年期間，西九新動力成員喺區議會一共有22個位，而地區顧問就有9個位。

成員議席嘅資料
區議會	代號	選區	名	註
油尖旺區	E07	富柏	陳偉強	同時係九社聯、新論壇成員
	E09	櫻桃	黃頌	同時係九社聯、經民聯成員
	E12	大南	莊永燦	同時係九龍社團聯會成員
	E13	旺角北	黃舒明	同時係九龍社團聯會成員
	E14	旺角東	黃建新	同時係九龍社團聯會成員
	E15	旺角南	仇振輝	同時係九龍社團聯會成員
	委任議員		侯永昌	同時係九龍社團聯會成員
深水埗區	F02	長沙灣	林家輝	同時係九社聯、經民聯成員
	F08	富昌	梁文廣	同時係九龍社團聯會成員
	F13	美孚中	沈少雄	同時係經民聯成員
	F17	李鄭屋	陳鏡秋	同時係九龍社團聯會成員
	F20	南山、大坑東及大坑西	韋海英	同時係九龍社團聯會成員，前中國國家女子足球代表隊成員
	委任議員		盧永文
	委任議員		黃頌良	同時係九龍社團聯會成員
九龍城區	G03	馬頭角	李蓮	同時係九龍社團聯會成員
	G04	樂民	楊永杰	同時係九龍社團聯會成員
	G06	何文田	鄭利明	同時係九龍社團聯會成員
	G16	黃埔東	梁美芬	同時係九社聯、經民聯成員
	G17	黃埔西	劉偉榮	同時係九龍社團聯會成員
	G18	紅磡灣	張仁康	同時係九龍社團聯會成員
	G20	家維	勞超傑
	G22	愛俊	左滙雄	同時係九龍社團聯會成員