陽光 (品牌)
香港飲品品牌
陽光（英文：Yeung Gwong，舊時叫Hi-C）係香港一個飲品牌子，由太古汽水有限公司創立，依家屬可口可樂公司旗下品牌。佢響1970年代尾開始推出橙汁飲品[1]，並喺1984年開始出紙包飲品，包括檸檬茶、荳奶同果汁飲品，係嗰時香港兩大紙包飲品牌子其中一個（主要對手係維他）。隨住2010年代頭，可口可樂公司響香港主力推銷另一個國際牌子飛想，陽光呢個牌子經已好少做廣告宣傳。
陽光響1980到1990年代曾經大賣廣告，廣告口號係「邊度都有陽光」，當中最經典嘅廣告係1987年嘅陽光檸檬茶電視廣告，由鄭伊健主演，廣告歌《如果...陽光》就由盧昭明主唱（曾經傳係楊楚營主唱，另外2010年由馮曦妤翻唱）。另外曾經演出過陽光電視廣告嘅演員重包括梁藝齡（1986年）、樊亦敏（1989年）、譚凱欣（1991年）、何嘉莉（1996年）、方力申（1997年）、張柏芝同黃宗澤（1998年）、何思諺（2010年）、李拾壹同陳蕾（2017年）、Dear Jane同蘇皓兒（2018年）等等。
陽光喺推出初期係將類似實物嘅素描圖印喺個包裝面度，而且有幾條橫線作為背景，1990年代初期改咗版，但係除咗係個盒背景嘅橫線改斜線之外就冇乜太大分別。喺1997年推出嘅包裝設計就同以往兩個版本完全唔同，代表飲品味道嘅生果同品牌字體都改成卡通化。2017年3月，陽光確認咗推出返1980年代嘅復刻版包裝，原定喺7月改返1997年個版本，不過最後陽光已經將呢個臨時設計常規化。1980年代嘅包裝係有一面用英文寫，現時嘅復刻版兩面都係中文寫。
睇埋
編輯出面網頁
編輯
 |