楊廣

(由隋煬帝跳轉過嚟)

隋煬帝楊廣569年618年4月11號),係隋朝第二位皇帝,604年到618年在位。

隋煬帝楊廣

雖然佢將科舉制度發揚光大、開通隋唐大運河,但因為佢好大喜功、窮奢極欲、窮兵黷武,逼到人民作反,最後畀叛軍宇文化及派人做瓜。

生平

楊廣係隋文帝楊堅第二仔,阿媽係獨孤伽羅開皇元年(581年)封為晉王。[1]588年,隋朝派大軍進攻陳朝,由楊廣做掛名統帥。600年,文帝廢太子楊勇,改立楊廣做太子。

604年七月,文帝過身,楊廣繼位,就係隋煬帝。文帝臨死之前終於睇到楊廣份人嘅真面目,想立番楊勇做太子,畀楊素知道咗,就通知楊廣同阻止,冇耐文帝就死咗。楊廣又假借文帝名義落命令將楊勇賜死。[2][3]

煬帝派人召并州總管、漢王楊諒返長安,但係份文帝璽書同楊諒之前同文帝暗中約好嘅唔夾,楊諒知道有古怪,於是起兵作反,但係畀煬帝派兵平息咗。604年十一月,煬帝下令喺洛陽起東都,喺第二年每月用成二百萬人去起,由於啲官員督工又嚴又急,有成四五成工人死咗。[2]

605年改用大業年號,同年起通濟渠,前後用成百幾萬人去起。[2]

607年,煬帝處死光祿大夫賀若弼、禮部尚書宇文弼同太常卿高熲。同年拉咗百幾萬男丁起長城,過程之中死咗五六成工人。608年,徵調百幾萬人民起永濟渠[1]

大業八年(612年),煬帝第一次東征高句麗,徵調過百萬士兵同大約兩百萬民伕,但係戰事唔多順利,於是撤軍。呢年發生旱災同瘟疫,死咗好多人,尤其係山東地區。[4]

613年,煬帝第二次東征高句麗,之後楊玄感響黎陽起兵作反,煬帝唯有撤軍。雖然楊玄感好快就失敗咗,但係各地啲人起兵自立一單接一單咁嚟。614年第三次東征高句麗,打到高句麗請降之後就撤軍。大業十一年(615年),煬帝去北方巡視嗰陣,畀突厥始畢可汗嘅大軍包圍,要等到突厥撤兵之後先甩到身。[4]

616年,煬帝走去江都,[4]之後冇再返番去東都(洛陽)。

617年李淵響太原起兵,入到關中,擁立代王楊侑做皇帝,就係隋恭帝,名義上將煬帝升做太上皇,但個效力只限於李淵控制嘅地方。618年三月,將軍宇文化及響江都作反,殺咗煬帝。[4]

參考