隱蔽青年

隱蔽青年（粵拼：yan2ching1/cheng1，hidden youth，日文：引きこもり／ひきこもり^Hikikomori），又叫蟄居族，係指大部分時間喺自己間房入面唔肯返學或者返工嘅青年。呢班青年可能面對住社會嘅排斥或者生活入面遇到困難、挫折同壓力而選擇自我封閉，過住足不出戶嘅生活。

隱蔽青年通常同父母一齊住，但係將自己長時間閉喺房間入面，好少同父母有溝通，甚至要父母將食物送到佢間房度，佢哋好多生活日夜顛倒。

香港出名嘅隱青有阿源，佢曾經表示「這些機會不是屬於我的」，之後成功脱毒，依家任職香港大學圖書館助理。

定義

根據香港基督教服務處總協調主任應鳳秀同香港浸會大學黃昌榮教授所講，「隱蔽」係一個社會現象，唔同年齡組別人士都可能會受到隱蔽問題困擾。任何人士持續超過三個月或以上都可視之為受到「隱蔽」問題困擾：

同社會入面各項系統缺乏聯繫同無從事參與，包括工作、教育、培訓、朋輩同社區，嚴重人士甚至係同家庭成員亦缺乏聯繫。
人際關係薄弱、驚或者拒絕同人接觸或者交談。
無社會身份地位，例如學生、受僱人士、受訓者、社區活動參與者等。
面對唔同程度嘅社會排斥，例如畀同學欺凌、成日畀老闆同埋同事鬧。

表現

隱青常見特徵係無實體社交，只係靠網上匿名社交同社會互動

當隱青感覺到有外在壓力，例如唔想去面對一啲社交場合，佢哋可能會選擇逃避或者自我防衛，減少外在給予嘅壓力同傷害。典型嘅例子就係將自己隱藏喺自己屋企間房入面一段好長時間。由於佢哋多數性格內向同無咩朋友，所以佢哋多數日頭就瞓覺，夜晚通宵上網、打機或者睇電視。隱青主要係因為拒絕同社會接觸而造成。

但係，隱青將自己隱蔽喺房間入面又未必會好開心，因為佢哋成日會感覺到自己受到威脅，又無屋企人、朋友、社工等人同佢分享心事。

原因

隱蔽青年可能面對住社會嘅排斥或者生活入面遇到困難、挫折同壓力而選擇自我封閉。

例如東亞國家太注重學生學業成績，從而畀咗青少年壓力，部分青少年可能就算佢哋幾努力，幾有心機讀書都追唔上進度，令到佢哋覺得自己失敗、無用，而選擇做隱青。當中，屋企人同社會亦畀咗唔少壓力畀佢哋。東亞教育普遍以填鴨式教育為主，加上傳統觀念覺得學歷高先有出息同畀人覺得係「乖仔」，從而形成升學主義。

第二個原因係呢啲青年畀同學蝦或者排擠，例如體型、學業同體能方面、財富以及種族。

協助

由於隱青主要喺畀人排斥、社會同屋企人對佢哋有太大期望或者生活入面遇到困難、挫折同壓力而選擇自我封閉，所以最重要應該要關心佢哋、理解佢哋諗法同多啲同佢哋溝通先可以幫佢哋脱毒。

家庭方面，屋企人可以多啲同佢哋溝通，理解佢哋嘅諗法，從而幫助佢哋。如果隱青仲係喺求學階段，屋企人唔應該將仔女嘅讀書目標定得太高，避免畀仔女太大壓力，搞到仔女以為自己好無用。屋企人亦要安排更加多嘅家庭活動同親子樂，從中促進家長同子女之間嘅友誼，令仔女願意同屋企人分享心事，同時家長亦可以從中更了解仔女。

學校方面，老師可以多啲關注學生之間嘅關係，如果發現有欺凌情況，應該要盡快處理，減少被欺凌者好驚返學嘅意欲。另外，學校亦唔應該畀學生太大壓力，同時亦要照顧唔同能力嘅學生。咁樣可以畀免部分抗逆力比較低嘅學生為咗逃避困難而選擇做隱青。除此之外，學校可以定期舉辦有關抗逆、學習、情緒管理同解決壓力嘅講座畀學生，令學生可以有一個更積極同正面態度面封難題。甚至可以舉辦有關家庭管教嘅講座畀家長，令到家長可以識得點樣管教仔女，以及協助同理解仔女。

政府方面，政府可以多啲宣傳有關隱青嘅特徵同性格，令到更加多人理解同幫助佢哋。政府亦可以投放更加多資源去青年中心去幫助佢哋。另外，政府亦可以鼓勵更加多機構聘請成功脱毒嘅隱青，令佢哋更加快可以容入社會，畀其他人接納，減少佢哋從返隱青生活嘅意欲。除此之外，政府亦可以投放更加多資源去學校同社區中心，令到隱青個案可以盡快協助同及時跟進，避免佢哋問題惡化。

屋企人反應

隱青經常畀屋企人認為只係家事，部分家庭抱住「家醜不外揚」嘅心態，對屋企入面嘅隱青難於啟齒，學校或者社會工作者亦好少介入。由於呢幾年嚟媒體廣泛報導同關注，隱青案例被視為社會病態，亦同精神病扯上關係。有好多屋企人都會先觀望一段長時間先會去尋求心理學家協助。喺東亞，大部份家庭主要由阿媽負責教育同照顧仔女，所以老豆成日會將問題推卸去阿媽身上。喺大多數情況入面，父母只會靜待一段時間作觀望，希望佢哋嘅隱青年仔女情況會有自然改善，父母大多數覺得呢個係隱青嘅必經之路，認為等待一段時間仔女就會自然重投社會。但係亦會有少數舊派父母會強迫佢哋嘅仔女去重投社會，極端情況入面會出現老豆殺死隱青事件。

睇埋

呢篇同社會有關嘅文係楔位文。歡迎幫維基百科擴寫佢。