集友銀行
集友銀行有限公司（英文：Chiyu Banking Corporation Limited）係一間香港註冊嘅持牌銀行，註冊地址喺香港中環德輔道中78號集友銀行大廈，銀行董事會主席係岳毅。
歷史
編輯集友銀行喺1947年7月15號由陳嘉庚等人創辦，註冊開業地喺香港，係香港第39間領有牌照嘅銀行。成立集友銀行係為咗解決集美大學經費短缺嘅困境，成立資金係十萬港元，從中得到股息同紅利，令集美大學有一個長期而且穩定嘅經費來源。1952年，集友銀行做咗外匯銀行公會同埋香港銀行票據交換所成員，喺1959年成為外匯授權銀行。集友銀行除咗喺香港有24間分行（2010年數字，包括7間喺香港島、8間喺新界、9間喺九龍）之外，喺中國大陸福州市五四路，同埋廈門市廈禾路都各有一間分行，喺廈門集美區有一間支行[1]。
截至1997年，集友銀行嘅資產總值喺世界各銀行入便排第603名；資本排名世界第560位，亞洲第185位。2000年底英國銀行家雜誌根據世界1000大銀行資本排名，集友銀行名列世界第465位。
集友銀行原本係中銀集團成員。2001年10月，中銀集團重組架構，集友銀行歸納成為中銀香港嘅子公司。因為中銀香港只係揸住集友銀行70.49%股權，其餘嘅由集美大學持有，所以佢嘅品牌可以保留，冇併入中銀香港。不過，集友銀行嘅運作可以話係完全依賴中國銀行。
2017年3月27號，雙方聯合公佈，有關集友銀行股權轉讓嘅所有工作全部順利完成，集友即日起成為廈門國際銀行旗下公司[2]。
參考
編輯- ↑ 集友銀行中國業務簡介
- ↑ 〈集友銀行股權交割圓滿完成〉。www.etnet.com.hk。喺2019-06-03搵到。
{{cite web}}: Cite has empty unknown parameter:|dead-url=(help)
