雙非人（形容詞式：雙非），廣義上係指父母雙方都唔係當地公民（或者永久居民）嘅居民。喺採取屬地主義嘅國家或者地區，一個人只要喺嗰個國家或者地區出世，就算父母雙方都唔係本地公民，都可以獲得公民身份。
喺香港，「雙非問題」係指2001年莊豐源案之後，大量配偶唔係香港永久居民嘅中國大陸孕婦湧入香港生仔女，以圖令到仔女一出世就有香港永久居民身份嘅問題。
