雪山獅子旗

雪山獅子旗原本係藏軍軍旗，西藏地方政府曾經拎嚟做西藏旗，支旗曾經象徵西藏獨立，同時又係西藏流亡政府嘅旗。近年達賴喇嘛表示，希望西藏達到真正自治，唔會再搞藏獨，幅旗嘅地位相當於特別行政區區旗噉。

雪山獅子旗

起源

自從9世紀因為吐蕃王朝分裂，所以西藏一直冇正規軍隊，一路到18世紀尾清朝嗰陣，清政府派兵幫西藏打走想入侵嘅人，之後制定《欽定藏內善後章程》，成立咗一隊三千人嘅藏軍，支旗就係咁喺1912年設計出嚟，用嚟做藏軍軍旗。第十三世達賴喇嘛喺1918年頒布，正式由拉薩西藏政府採用。

1951年，中華人民共和國中央人民政府同西藏地方政府簽訂《和平解放協定》，解放軍進駐西藏之後，西藏旗就由五星紅旗取代。1959年3月，發生拉薩衝突，之後解放軍佔領西藏全境，又下令取締西藏政府，响西藏境內實施民主改革，第十四世達賴喇嘛同八萬藏人離開西藏後，呢支旗就畀中華人民共和國當係西藏獨立運動嘅標識，下令嚴格禁止唔畀拎出嚟用。不過香港因為基本法入面保障咗言論自由，所以呢支旗無喺中國大陸咁唔畀拎出嚟，不過由於支旗因為太敏感，所以喺香港都唔容易買到，只可以上網訂。

而家喺印度達蘭薩拉嘅西藏流亡政府，就繼續用緊呢支雪山獅子旗。

含意與精神

雪山獅子旗個設計有呢啲涵意：

• 中心個雪山象徵雪域西藏。
• 空中六道紅色嘅柱光象徵原始西藏民族之中，色、穆、冬、黨、哲、扎六大氏族。
• 紅色柱光同藍色天空象徵紅黑兩大護法護持政教事業。
• 雪山頂上升起嘅太陽，光芒四射，象徵雪域西藏全部眾生享受自由、信仰、富裕、幸福同公平公正。
• 雪山上嘅兩隻雪獅象徵政教結合事業戰勝一切。
• 高舉之具三色嘅寶焰象徵西藏人民永遠敬信同頂禮佛法僧三寶。
• 雪獅隻手舉住兩色嘅如意寶，象徵遵循十善法同十六人法為核心嘅正教中取捨善惡之法。
• 黃色邊框象徵佛法長駐人世直至普渡眾生事業完成。

另一個意思

除咗一個意思，又有人話佢有另一個意思，話中間隻獅子係象徵嗰陣嘅清政府。