預設效應

預設效應（英文：default effect）係輕推理論上嘅一個概念，指啲人傾向「跟從預設選項」。

想像有個人要揀一個選項，其中一個選項係「預設」嘅，即係話如果個人唔做決定，系統就會當佢揀咗個預設選項；實證表明，除非個預設選項明顯唔好，否則啲人好多時會為咗慳時間而「一於跟個預設選項」－呢種現象就係所謂嘅預設效應。

政策專家指，政策制定者可以將「想啲人揀嘅選項」設做預設選項。例如家陣政府想啲人揀用可再生能源，佢哋畀人填表格嗰陣可以將「用可再生能源」設做預設選項－啲人有權揀唔用，但經驗表明，啲人除非真係好唔想用可再生能源，否則就會跟預設選項。