香港四大才子

「香港四大才子」，又叫香江四大才子，係指香港四個文人，分別係金庸、倪匡、黃霑同蔡瀾，四人各有所長，都係有學問之人，而且分屬好友，所以畀人叫做「香港四大才子」。四人嘅成就大概由廿世紀七、八十年代開始多人識亦受到推崇，而其中黃霑、金庸同倪匡分別喺2004年、2018年同2022年過身，只有蔡瀾間中做電視節目同寫美食書。

「香港四大才子」其中三人倪匡、黃霑同蔡瀾曾經喺1989年至1990年間一齊主持亞洲電視（ATV）經典成人清談節目《今夜不設防》。2013年，喺黎智英邀請下，倪匡同蔡瀾喺壹傳媒主持每個星期一集嘅清談視像節目《亂噏廿四》。