香港教育
香港教育主要由香港特別行政區政府教育局管理，而家嘅制度上大致分為學前教育、小學教育、中學教育、專上教育，小一至中三屬於九年強迫教育，而家香港提供小一至中六嘅十二年免費教育，除咗私立或直資學校之外，喺官立或政府資助學校進行為期十二年嘅小學同中學教育，都唔使交學費。2016年，時任香港特首梁振英喺2016年施政報告宣告2017/18學年開始推行半日制幼稚園免費教育，預計大約七至八成嘅半日制幼稚園學位將會免費[1]。
教育階段
編輯| 歲數 | 年級 | 教育階段 | 學校 | ||||
|---|---|---|---|---|---|---|---|
| 2 | N1 | 學前教育 | 幼兒園 | ||||
| 3 | K1 | 幼稚園 / 幼兒園 | |||||
| 4 | K2 | ||||||
| 5 | K3 | ||||||
| 6 | 小一 | 小學教育 | 小學校 | ||||
| 7 | 小二 | ||||||
| 8 | 小三 | ||||||
| 9 | 小四 | ||||||
| 10 | 小五 | ||||||
| 11 | 小六 | ||||||
| 12 | 中一 | 中學教育 | 中學教育 | 中學教育 | 中學校 | ||
| 13 | 中二 | ||||||
| 14 | 中三 | ||||||
| 15 | 中四 | 香港中學文憑考試 | GCSE / iGCSE | ||||
| 16 | 中五 | 國際文憑課程 | |||||
| 17 | 中六 | 普通教育高級程度證書 | |||||
| 18+ | 專上教育 | N/A | N/A | N/A | |||
學前教育
編輯香港嘅學前教育大致可以分為幼兒園同幼稚園兩種。兩種都係私立經營，有啲係商業化集團形運嘅幼稚園集團，亦有由非牟利團體或教會開辦嘅幼稚園。
香港嘅幼兒園同幼稚園本來有唔同嘅服務對象：幼兒園嘅服務對象係未適合進入幼稚園嘅幼童，為家長提供托兒服務；而幼稚園嘅服務對象係3至6歲嘅幼童，畀佢哋喺學校環境裏面學習群體相處，同埋接受最基本嘅教育。幼稚園由教育局管理，而幼兒園就由社會福利署管理。不過而家唔少幼兒園都兼營幼稚園相同嘅業務，令到6歲以下嘅幼童都可以喺幼兒園入面接受教育。
小學教育
編輯香港嘅小學主要分為四大種類：官立小學、資助小學、直資小學同私立小學，大部分嘅小學（超過八成）屬於「資助小學」。官立小學同資助小學都係提供免費小學教育，而直資同私立小學係會收學費[2]。
而家香港提供六年制嘅小學教育，小一最低入學年齡係嗰個學年嘅9月1號夠五歲八個月[3]（12月31號之前要夠六歲），而家大部分小學上堂模式都係全日制，以前學校係半日制分做上晝班、下晝班。官立小學同政府資助小學都提供免費小學教育。五年級終期試同六年級頭兩次考試嘅考試成績，需要呈交教育局，呢三次考試稱為呈分試，教育局會因應各同學喺呢三次考試嘅成績來决定嗰位同學升中學嘅派位組別，參加統一派位嘅學生，呈分試嘅成績會直接影響升中學嘅派位結果。
中學教育
編輯而家香港嘅中學教育以六個年級為主，香港嘅中學大部分初中同高中都喺同一間學校，通常中一至中三叫做初中，中四至中六叫做高中；讀完中三之後或者年滿十五歲就可以選擇繼唔繼續讀，唔讀就出嚟做嘢，或者轉讀其他職業訓練課程；中六下學期尾（三月至五月）參加香港中學文憑考試（DSE）或者香港認可嘅國際公開試，要喺公開試達到指定成績（分數）先至可以升讀大學，如果成績未達到升讀大學嘅要求，可以轉讀其他專上課程，例如應用教育文憑、副學士、香港專業教育學院開辦嘅基礎文憑或高級文憑課程。
特殊教育
編輯教育局會根據專業人士嘅評估同建議，喺家長嘅同意之下，轉介有較嚴重或多重殘疾嘅學童入讀特殊學校，以便接受加強支援，而其他有特殊教育需要嘅學童就可以入讀普通學校。香港共有60間資助特殊學校（包括一間喺18間公營醫院裏面開設班級嘅醫院學校），為視障、聽障、肢體傷殘、智障，同埋有情緒或者行為問題嘅兒童提供教育服務。呢啲特殊學校接受政府資助並由唔係政府嘅機構營辦。其中有部分學校亦擔當資源中心嘅角色，支援普通學校照顧有特殊教育需要嘅學生。
香港嘅特殊學校一般根據學生嘅特殊需要分為以下六種學校：
- 視障特殊學校
- 聽障特殊學校
- 肢體傷殘特殊學校
- 群育學校（為有適應困難學生而設，一般都係有紀律問題）
- 智障特殊學校（又分為：輕度智障特殊學校、中度智障特殊學校、輕中度智障特殊學校、嚴重智障特殊學校）
- 醫院學校
專上教育
編輯香港共有29間院校開辦經本地評審嘅自資副學位、學士學位同銜接學位課程。職業訓練局、香港城市大學、香港理工大學同香港教育大學亦有開辦公帑資助副學位課程。
高等教育
編輯香港有20間頒授本地學位嘅高等教育院校，有八間由教資會資助，另外12間由公帑撥款或自資。
由教資會資助嘅院校：
公帑撥款嘅院校：
自資嘅院校：
新來港兒童教育
編輯教育局為新來港兒童（包括內地新來港兒童、新來港非華語兒童同回流兒童）提供學位安排服務。學童可喺入讀香港主流學校之前，首先修讀為期6個月嘅全日制啟動課程，呢啲課程協助佢哋適應香港社會同教育制度。至於選擇直接入讀公營學校或直接資助計劃學校嘅新來港學童，教育局會向有關學校提供校本支援計劃津貼，為學童安排支援項目。此外，教育局亦資助非政府機構為學童開辦為期60個鐘頭嘅適應課程，內容包括個人成長、社區適應同基本學習技巧。
資歷架構
編輯資歷架構喺2008年正式推行，提供一個高透明度同開放嘅平台以推動終身學習，藉此提升香港勞動人口嘅整體競爭力。資歷架構係一個七級嘅資歷級別制度，用以整理同支持學術、職業專才教育同持續教育界別嘅資歷。資歷架構設有質素保證機制，以鞏固架構嘅公信力。所有獲資歷架構認可嘅資歷都已經通過質素保證。
相關
編輯參考
編輯註
編輯書目
編輯- 香港教育統籌局，（2000年），《終身學習‧全人發展》教育統籌委員會教育改革報告書，香港：香港特別行政區教育統籌局。
- 香港教育統籌局，（2001年），《學會學習：課程發展路向》
- 課程發展議會，（2002年），《基礎教育課程指引：各盡所能‧發揮所長（小一至中三）》，香港：香港特別行政區教育署。