香港樂隊熱潮

香港樂隊熱潮通常指兩次，第一次係1960年代香港興起嘅樂隊熱潮，嗰陣香港興起夾Band熱，好多人組織樂隊，喺學校嘉年華會、中學Party表演，代表係Talent Quest比賽，捧咗好多出名嘅樂隊，例如 Teddy Robin & The Playboys、The Lotus 等等。

第二次樂隊熱係指1980年代香港興起嘅樂隊熱潮，嗰陣好多樂隊都畀大唱片公司睇中，簽約出碟，代表有Beyond、太極、達明一派等等，1986至1987年係最高峰，1989年散晒。

第一次樂隊熱潮編輯

1960年代，正係戰後嬰兒潮啲細路大個晒，後生仔最多嗰陣，由於係一個反叛年紀，結果英國樂隊披頭四嘅反叛形象，就啱晒路數，喺全世界都興起披頭四狂熱（Beatlemania），對嗰陣時香港嘅後生仔有好大影響，好多人都學披頭四咁走去夾band，結果觸發咗一輪夾band熱潮，嗰陣幾乎每間學校都有樂隊，由最初模仿外國樂隊例如披頭四、滾石樂隊，到後來有啲band會自己作歌，成為嗰陣一種「青春次文化」。