香港文化粵拼hoeng1 gong2 man4 faa3)係香港嘅地方文化香港人祖籍大半都係喺廣東或者廣西,而嗰一頭嘅地方文化-亦即係嶺南文化-本嚟就已經因為歷史原因同中國北方嘅文化好唔同。而香港因為身為前英國殖民地嘅歷史背景同埋國際貿易港嘅地位,構成咗文化上粵英薈萃。再加埋佢哋同其他亞洲地區嘅交流多,吸收咗唔少(例如)日本嘅文化。總體嚟講,佢有一套同中原等地好唔同嘅特色[1][2][3]

呢篇文係
香港人口文化系列之一
香港人口普查
2011年人口普查
香港人    新界原居民
海外港人
宗教與風俗
哲學
語文    用語
文學
建築
殯儀    節日同公眾假期
飲食    燒烤文化
電影    電視
音樂
傳媒
藝術    古蹟
漫畫    動畫
體育
網絡文化    高登文化
香港次文化
無厘頭文化
MK文化
MK Pop
港鐵文化
巴士迷文化
其他香港系列
香港嘅維多利亞港

香港坐正咗喺嶺南最南端嘅珠江口岸,對住個南中國海,憑住好靚嘅地理位置同埋維多利亞港,發展咗做一個國際貿易同轉口港。直至廿一世紀,佢更加係成個亞洲嘅金融服務中心。香港嘅總面積係 1104 平方公里左右,由香港島九龍半島新界三個區域組成。維多利亞港喺香港島同九龍半島中間,而新界就同中國大陸連住。雖然香港俾人嘅印象係好熱鬧嘅大城市,但係其實佢有成七成嘅面積都係郊野,而且佢周圍嘅水域度仲有成超過 200 個島仔-包括香港國際機場。總括嚟講,香港嘅地形基本上就係一個地少人多嘅沿海商貿都市,所以佢嘅文化就好自然係以海洋文化同商業文化做主導[2]

香港嘅氣候亦都影響到佢嘅文化。佢係屬於亞熱帶氣候,四季分明。五至十一月係風季。春天又暖又濕,夜晚嗰陣會涼啲;夏天熱辣辣又濕立立,好好太陽,耐唔耐會打風行雷;秋天會有金風送爽,天氣好溫和,係全年最舒服嘅季節;冬天就好涼爽,間中會有冷鋒,但係氣溫好少可跌到攝氏 5 度以下,基本上唔會落雪。呢種氣候同嶺南地區好似,所以香港嘅建築喺好多地方都會好似嶺南噉,會用涼爽啲嘅建築風格,而且因為佢天氣係有啲熱,香港人都興飲啲好似涼茶呢類嘅嘢飲嚟降吓溫[4]

點嚟 編輯

 
公元前 200 年之前嘅越國嘅雕塑;嗰時成個嶺南都仲係百越各族嘅地頭。
內文:香港史

由南越到漢化 編輯

喺上古同中古時期,香港嘅歷史文化同嶺南其他地方冇乜大分別,都係一個由南越去漢化嘅時期。喺公元前 110 年,控制住成個嶺南地區同埋今日越南北半橛嘅古國-南越國-俾漢朝帝國打冧咗,令到包埋香港在內嘅嶺南做咗中原皇朝嘅領土。但係嗰時呢頭住嘅都仲係南越族百越嘅一個分枝)。南越族喺文化上未漢化,所以一般都唔會俾人當係漢人。去到 7 至 13 世紀嗰時,嶺南俾大唐大宋斷斷續續噉統治,再加埋中原俾胡人侵略,有大批漢人由北面走難落嚟嶺南度住,先至令到嶺南呢頭開始漢化。漢化咗之後,嶺南文化基本上成咗形,做咗一種同時有唐宋漢文化同南越文化喺入面嘅新文化:好似係廣東話噉,佢有些少南越話嘅特徵,但係佢總體又好似唐宋漢人講嘅話。呢段歷史亦都反映咗喺血統上面:直至廿一世紀,包埋香港人在內嘅粵人普遍都有齊古漢人同南越人嘅血統[5][6]

元明清統治 編輯

喺 13 世紀,香港第一次喺歷史舞台度有人會提。嗰陣嘅南宋皇朝俾蒙古人打冧咗。據講南宋最後嘅一個皇帝宋端宗南宋亡國嗰場仗之前嚟香港住咗一陣,而呢個就係今日香港嘅地標宋王臺嘅起源。因為好多人都覺得大宋係最後一個正統嘅中華皇朝[7],所以呢個地標好有歷史價值。打後嗰一二百年,香港嘅人同其他粵人一樣,俾大元帝國分類做「南人」。去到 15 世紀嘅大明時期,香港人同其他粵人先至俾人正式噉認做漢人。嗰時嘅嶺南做咗大明對外貿易嘅港口,引到好多西歐人嚟做生意,令到嶺南文化多咗啲西歐嘢喺入面,但係嗰陣時香港喺文化上除咗有圍頭人嘅圍頭文化之外仲係同廣州或者佛山呢啲嶺南城市冇乜明顯嘅分別。要一路去到成 19 世紀,大清將香港割讓咗俾大英帝國,先至令到香港人開始咗有自己嘅一套文化同埋身分認同。

英治時期 編輯

內文:香港英治時期

香港喺英國人統治下好多地方都進步得好快。佢喺經濟方面好標青,係嗰時亞洲最有錢嘅地方之一,好多廣東廣西嘅粵人都因為中原打仗打到七國噉亂走難落咗嚟香港度長住,令到人口升得好犀利。基本上除咗喺俾日軍控制住嘅三年零八個月時期,香港成個廿世紀都係飛躍緊嘅狀態。喺廿世紀後半橛,香港仲學人整流行曲、拍戲、同搞動畫,開始有埋文化上嘅影響力[3]。喺打後嘅廿一世紀頭,佢人均 GDP 仲高過美國。成個過程入面,香港由嶺南其他地方嗰度引入咗啲文化,又學咗好多英國嘅文化。除咗噉,日本喺二戰投降之後就開始行和平主義搞經濟同文化產業,後尾做埋香港最大嘅貿易拍擋之一,對香港有好大嘅文化影響力[8]

香港文化嘅主體係嶺南文化同埋英國文化。香港人嘅祖籍九成都係喺廣東或者廣西,所以香港繼承咗好多嶺南嘅文化:傳統嚟講,香港人講嘅係嶺南嘅廣東話,起嘅係嶺南建築,有搞開啲嶺南視藝,會聽啲嶺南戲曲,而食嘅嘢又係廣東菜多;因為英國人主要係統治,香港學嘅英國文化多數都係啲制度上嘅嘢:英國話係香港嘅法定語言之一,香港啲法官會好似英國嗰啲噉戴假髮,佢哋又會好似英國噉喺某啲正式場合度吹蘇格蘭風笛,而且香港周街都係啲有齊嶺南同西歐風味嘅唐樓建築;喺文化上嚟講,香港可以話係粵同英薈萃。除咗噉,香港仲有少少本土文化-喺粵人大規模移民嚟香港之前,香港已經有圍頭人同蜑家人呢類嘅本地人。佢哋世世代代都係喺度住嘅。佢哋啲文化-好似係圍村建築同盆菜-都有幫手豐富咗現代嘅香港文化[9][10][11]

語文 編輯

 
繁體嘅漢字
內文:香港語文

香港嘅官方語文係「中文」同「英文」。所有官方標誌都係用雙重文字(繁體中文加英文)寫,而大部分嘅舖頭同餐館嘅招牌都會有齊呢兩種文字。

中文 編輯

喺語言上,因為香港人嘅祖籍大半都係喺嶺南地區,屬於粵人,所以九成以上嘅香港人日常生活講嘅都係廣東話。廣東話係一種歷史好悠久嘅語言,佢有成過千年歷史,保留咗啲南越話嘅特徵,但係總體又好近唐朝宋朝漢人講嘅話-攞嚟讀唐詩宋詞仲會好押到韻[12][13][14][15],而且佢仲有自己嘅一套詩。喺今日嘅香港,政府要對市民講啲乜都會用廣東話嚟講,而香港拍嘅戲同作嘅歌幾乎全部都係用廣東話嚟去唱同埋表達嘅。廣東話仲同香港人嘅身份認同好有關係,好多時一個人俾唔俾人當佢係「香港人」,其中一個最重要嘅條件就係睇佢肯唔肯學講廣東話[16][17]

除咗廣東話之外,香港亦都有少部份嘅人係粵人以外嘅東方人,會講客家話潮州話、或者係日本話呢啲東方語言。

喺文字上,香港人用嘅主要係漢字繁體)。呢種文字由上古時代嘅甲骨文演變出嚟,後嚟喺 6 至 7 世紀(大唐時期早期)左右有咗今日見到嘅樣。呢種文字寫得嗮中文書面語-即係普通話白話文-入面嘅字,而呢種書面語亦係香港政府公文用嘅書寫系統。雖然係噉,要淨係用呢啲字嚟寫廣東話就有啲難度:廣東話入面有好多字都冇明顯相應嘅漢字,搞到香港人講就講廣東話,但係寫嘢嗰陣就焗住要用好似普通話噉嘅中文書面語-語同文唔夾。於是乎,香港人就喺廿一世紀初頭嗰陣開始整咗啲粵字,嚟去寫自己嘅母語。

粵字 編輯

 
多得香港人,而家粵人有得用粵文寫維基百科。
內文:粵字

粵字(粵拼:jyut6 zi6)係指一啲喺廣東話度先會用到嘅字。佢哋唔係香港嘅官方文字,但係喺香港同嶺南地區民間都好多人用,喺廣告、電視、同埋網上討論區呢啲地方都會見到。廣東話喺好耐之前已經有,但係要寫佢落嚟就有啲難搞[13][14][15]:一,佢歷史太耐,有好多字嘅寫法似乎都失傳咗;二,佢入面有一啲南越話嘅字,嗰啲字未必會有相應嘅漢字。因為噉,香港就有咗一種粵字文化-香港人會根據《六書》嚟去創做一啲新嘅唐式方塊字出嚟,好似係個「嘅」字噉-佢從「口」字部,表示佢喺口語上嘅用字,配埋個「既」字嚟去表音,就做咗個「嘅」字。除咗個「嘅」字,仲有「嗰」、「啲」、「噉」、「喺」、或者「冧」呢啲。呢柞字望落都好似漢字,而且運作原理亦都同漢字好似,但係查實唔係由古漢人留落嚟嘅,佢哋嘅存在專係為咗攞嚟寫廣東話-所以就叫做「粵字」。

到咗廿一世紀,香港同其他嶺南地方嘅民間開始有啲人主張用多啲粵文嚟寫嘢,等粵人有得「我手寫我口」[18],甚至乎連政府嘅公文同埋電視都開始有用粵字。

英文 編輯

內文:港式英文

香港俾英國人殖民過。英國派嚟幫手管香港嘅英國人都係講英國話嘅,而且香港又係國際商業都市,所以英國話喺呢度俾人廣泛噉用,喺法律、生意、同遊客區都成日見到。英國話有過千年歷史,有好豐富嘅文學,同德國話係近親,同法國話係遠親。喺文字方面,英文同德文、法文一樣,係用咗由古羅馬嗰度傳落嚟嘅羅馬字母嚟寫嘅。佢同漢字唔同,係一種拼音書寫系統-佢直接噉將把口講嗰啲字嘅音寫落嚟,所以冇語同文唔夾呢一個問題。

英美嘅英語流行文化喺香港都有唔少影響力。香港人講嘅港式廣東話入面有好多由英國話度借過嚟嘅字,而佢哋講嘢嗰陣又好多時會粵英夾雜,俾外國人話佢哋講嘅語言係「Kongish」(香港話)[19]

建築 編輯

內文:香港建築

香港嘅傳統建築都係以粵風格嘅嶺南建築為主。香港開埠初時嗰陣有好大批嘅粵人由廣東廣西搬嚟香港度住,將佢哋嗰套建築文化帶埋嚟。嶺南建築本身已經係一套俾中國承認咗係好有自己特色嘅風格,而香港吸咗呢種風格之後再加咗啲西歐嘢,自然更加會有一套同北方唔同嘅風格。

嶺南建築 編輯

內文:嶺南建築

嶺南建築(粵拼:ling5 naam4 gin3 zuk1),又或者叫「粵式建築」,好有地方特色[20][21][22]。呢種風格出咗名輕,而且會用通透同抗霉嘅材料嚟起,色水上鍾意灰白或者係綠呢啲柔和嘅色調。喺結構上有多層嘅斜坡頂同埋方形柱,而且因為氣候暖,令到粵人傳統鍾意向外面行-所以古典嶺南民居建築就有咗好多露台啲噉嘅開放式結構。香港人嘅祖先多數係粵藉,所以自然起咗好多粵式建築。

唐樓 編輯

內文:唐樓

香港零舍多粵英薈萃嘅建築物-唐樓

英式建築 編輯

睇埋:英式建築

香港曾經做過英國殖民地,唔出奇噉起咗啲英式建築[23][24]

其他 編輯

除咗噉,香港仲有園村建築棚屋等嘅本土建築風格。而且喺廿世紀初期香港仲起咗少少唐朝建築

視藝 編輯

視覺藝術方面,香港主要都係搞粵式視藝同西歐視藝多。

粵式視藝 編輯

 
高劍父 1935 年畫嘅《漁港雨》;佢揉合咗國畫同水彩畫,係早期嶺南畫派作品。
內文:嶺南文化#視藝

嶺南本身已經有好幾個獨有嘅視藝流派。好似係嶺南畫派噉,就係揉合咗東方嘅國畫同西歐嘅水彩畫而變出嚟嘅新風格[25];而且嶺南仲有自己嘅一套書法盆景、同埋園林風格。作為嶺南嘅文化大城之一,香港都有搞開呢啲嶺南美術,好似係香港嘅畫家楊善深就俾人嗌做「嶺南畫派最後一位大師」[26]。除咗噉,香港亦都收藏咗《袁崇煥督遼餞別圖詩》呢幅嶺南書法嘅詩畫作品。總體嚟講,直至廿一世紀,香港雖然冇話出到好多特別犀利嘅粵式視藝家,但係佢喺呢方面都喺度穩定噉進展緊,仲已經有啲起色。

香港藝術館間唔中都會展出呢啲粵式視藝。

 
香港藝術館收藏嘅《廣彩纏枝花卉雙龍耳瓶》

香港廣彩 編輯

內文:廣彩#香港廣彩

廣彩(粵拼:gwong2 coi2),全名叫做「廣州織金彩瓷」,係一種喺白色瓷器上面加彩繪燒出嚟嘅工藝品[27][28]。佢出咗名色彩絢爛,畫工又精細。呢種工藝開頭係喺 16 世紀尾嘅大明時期,當時啲粵人由景德鎮運啲白瓷過嚟,再喺廣州嗰度幫啲瓷器油顏色、加圖案、再燒製。廣彩後嚟仲擴展咗去嶺南嘅其他大城市,例如香港就喺 1930 年代開始學廣州噉搞廣彩。香港人開咗好幾間廠整廣彩,啲成品仲出口去到美國、西歐國家、南美、東南亞、大溪地、同馬達加斯加呢啲地方。喺 1970 年代,美國唔俾佢自己國家再入口啲有嘅瓷器,而廣彩要用得攝氏 800 度嘅低溫去燒製,唔夠熱-冇辦法清走嗮廣彩瓷器入面嘅鉛同鎘,搞到成個香港廣彩業大受打擊。而廿世紀後尾嘅香港廣彩業亦都冇乜點再有進展。到咗廿一世紀,香港嘅廣彩業因為大陸嘅粵廣地區開始識整廣彩而開始冇乜點再搞,但係都仲有啲瓷藝發燒友喺嗰度嘗試緊將呢種工藝搞落去[29]

西歐美術 編輯

香港仲有搞開啲西歐風嘅視藝,例如係油畫水彩畫、同素描呀噉。喺尖沙咀海邊嘅香港藝術館嗰頭成日都會有一大柞藝術家聚集展示佢哋啲作品同埋幫路過嘅人畫素描-已經係一種次文化,而且仲出咗啲有料到嘅藝術家,好似係瘋狂畫室劉忠發噉,佢係畫炭筆素描嘅高手,可以喺五分鐘之內畫好一幅炭筆素描,叻到喺「世界華人藝術精品大展」度攞埋個「金紫荊藝術家獎」[30]

除咗畫畫之外,香港亦都有一個都幾活躍嘅雕塑美術學會[31]

香港塗鴉 編輯

 
「九龍皇帝」嘅作品
內文:香港塗鴉

香港人亦都好興整塗鴉。塗鴉係一種喺馬路、建築物、或者其他公共設施上面畫公仔或者寫嘢嘅民間藝術。佢喺古希臘古羅馬時期已經有,家吓成個歐美地區都見得到。整塗鴉嘅人未必係專業嘅藝術家,但係佢哋啲作品就好多時會好反映得到平民階層嘅文化。嚴格嚟講,塗鴉喺香港係犯法嘅,但係港府對民間嘅塗鴉基本上係隻眼開隻眼閉,令到香港人有咗整塗鴉嘅習慣。香港塗鴉好多樣化-由典雅啲嘅書法作品以至心情日記、諷刺時弊、或者惡搞政治人物嘅作品都會有,當中人稱「九龍皇帝」嘅曾灶財係一個零舍出名嘅香港塗鴉藝術家-佢啲作品甚至仲有香港人覺得係香港嘅象徵。到咗今日,塗鴉喺香港嘅街頭巷尾(尤其係油尖旺呢啲旺嘅地區)基本上無處不在。

而家連英美嘅人都開始有啲當咗香港塗鴉係一種藝術形式。香港人自己亦都開始咗認真噉看待塗鴉,仲會搞啲有關香港塗鴉藝術嘅活動[32]

香港漫畫 編輯

內文:香港漫畫

漫畫係一種摩登視藝。喺廿世紀早期,香港已經有人畫啲諷刺清政府嘅漫畫。而喺 1970 年代開始,香港人仲開始興睇公仔書。初頭好多時都係用打打殺殺嘅武俠或者黑社會嚟做題材,但係好快就出現咗其他類型-例如係鬼故或者綜合型-嘅漫畫。到咗今日,香港已經周圍都係漫畫,無論係報紙定係書報攤都會賣香港人畫嘅漫畫同香港人整嘅漫畫雜誌(日本漫畫都好受歡迎),而且書舖仲會賣好多講畫漫畫嘅書(多數係跟日本學嘢嘅)。香港漫畫(粵拼:hoeng1 gong2 maan6 waa2)喺國際社會都有啲聲望-係一種其他國家嘅人都承認嘅獨到漫畫風格。香港嘅漫畫畫風好多樣化,但係共通點係多數都鍾意搵啲貼近現實生活嘅題材,好似係《牛仔》同《老夫子》都會描繪香港人(以至粵人)嘅日常生活。

演藝 編輯

粵英薈萃嘅香港喺表演藝術方面可以話係好嘢多籮籮。首先,香港由嶺南文化嗰度繼承咗大戲呢種舞台藝術,又有搞開芭蕾舞團,而且自從喺廿世紀中期開始,香港就一路發展,有拍好多戲同埋電視劇,仲一度係世界上最大嘅電影業之一。雖然話廿一世紀頭嘅香港嘅演藝係跌咗少少,個市場俾日本同韓國霸咗去,但係就算喺西人嘅地方佢都仲有啲熱烈嘅擁躉。

大戲 編輯

大戲(粵拼:daai6 hei3),正式啲嗌做「粵劇」,係嶺南傳統演藝嘅代表[33],知名度高到俾人列咗入世界非物質文化遺產名錄。佢嘅起源有得追溯到 13 世紀尾嘅南宋時期:嗰時嘅中原戲曲跟住向南走難嘅漢人一齊落咗嚟,後嚟再受西歐音樂形響咗而變成今日嘅大戲。今日嘅大戲係一種結合咗唱做念打、音樂、同埋戲服嘅綜合型舞台藝術。佢配樂好多變,有粵胡等嘅專屬樂器,而且仲因為兩廣地區同西歐國家交流得多,會用好似小提琴呢類嘅西人樂器。喺西化嘅香港,大戲都仲有一定嘅影響力,尤其係喺老一輩嘅人群。喺香港,大戲當中嘅神功戲(粵拼:San4 gung1 hei3)零舍出名。呢種戲係一種喺神誕、廟宇開光、同太平清醮呢啲拜神或者大時大節嗰陣上演嘅戲,仲有自己嘅一套儀式同傳統,會喺演之前拜一輪祖先或者神先嚟向祖先同神表示敬意先至開始做戲[33]

到咗廿一世紀,大戲喺香港一般都俾人覺得係一樣老人家先會鍾意嘅嘢,喺後生仔後生女之間人氣唔係好高-開始有啲衰落,但係好似香港八和會館呢類嘅大戲組織都仲係繼續噉努力喺香港推廣大戲文化[33][34]

香港中樂團藝術總監兼首席指揮閻惠昌帶領樂團喺 2009 年東亞運動會閉幕禮嗰度表演。
家吓幾乎所有歐美國家都有芭蕾舞團。
一個典型嘅交響樂團

中樂團 編輯

內文:香港中樂團香港廣東音樂團

香港亦都有搞開啲演奏中樂嘅樂團。「中樂」喺泛指唐人嘅傳統音樂,而且每個民系都有自己一套嘅傳統音樂。香港就主要有兩個中樂團-香港中樂團[35]同香港廣東音樂團[36]-前者玩啲普遍嘅中樂,而後者就專攻廣府民系獨有嘅廣東音樂。呢兩個樂團都屬於中大型嘅樂團(例如前者就有成 85 個專業演奏家),仲有喺啲國際大事度表演過,例如香港中樂團就曾經喺 2009 年東亞運動會閉幕禮嗰度表演,而且評價唔錯。

除咗表演,佢哋仲有喺香港搞啲推廣中樂同廣東音樂嘅活動。

芭蕾舞 編輯

內文:香港芭蕾舞團

芭蕾舞(英文:ballet)係一種起源喺 15 世紀意大利嘅舞台藝術,尤其是係俄羅斯法國搞得最叻。佢後嚟仲出咗古典芭蕾現代芭蕾呢啲分枝。比較多人識嘅古典芭蕾(Classical ballet)係一種透過音樂、舞台設計、同埋肢體語言嚟講故仔嘅藝術型式。香港因為俾西歐人影響得多,都學人搞咗個芭蕾舞團,而且仲真係有啲料到。香港芭蕾舞團係喺 1979 年成立嘅[37]。佢哋啲舞蹈員有嚟自香港、中國大陸、或者日本呢啲亞洲地區,都係區內芭蕾舞蹈員嘅精英。呢個團係亞洲其中一個最大型嘅古典芭蕾舞團。佢哋最出名嘅地方係會搞西方古典芭蕾得嚟又會搵啲有東方特色嘅題材整新芭蕾,例如佢哋就曾經演過《木蘭》-一場攞花木蘭嘅故仔做板嘅芭蕾舞,可以話係好體現到香港粵英薈萃嘅特色。

交響樂團 編輯

內文:香港管弦樂團
內文:香港小交響樂團

交響樂團(英文:orchestra),又叫「管弦樂團」,係指一啲演奏管弦樂嘅樂團。一個交響樂團一般由四個樂器群-弦樂器木管樂器銅管樂器、同敲擊樂器-組成,一次可以有成上百個演奏家一齊演出。樂團體制仲有分大中細,當中「小交響樂團」(Sinfonietta)係中型嘅交響樂團,一次演出會有五廿零個演奏家左右。交響樂團呢種演藝源自 15 至 16 世紀(文藝復興時期)嘅意大利,後嚟話噉快就傳嗮去成個日耳曼地區-包括咗英國;跟手歐洲文化大國法國又因為喺嗰時搞芭蕾舞搞得好勁,而芭蕾舞呢家嘢要搵樂團伴奏,就好快順勢搞埋一份;最後,交響樂團傳嗮去成個歐洲,仲跟住歐洲人去勻全世界。香港管弦樂團(Hong Kong Philharmonic Orchestra)[38]同埋香港小交響樂團(Hong Kong Sinfonietta)[39]分別係喺 1947 年同 1990 年成立嘅。佢哋都係屬於亞洲區入面最有影響力嘅交響樂團,後者曾經俾人請去法國嘅聖里奇音樂節同埋其他好幾個歐洲國家嘅音樂節嗰度演出,表現仲唔錯。而且佢哋有喺香港本地度推廣交響樂。

 
香港人作嘅卡通豬仔麥兜

粵語流行曲 編輯

內文:粵語流行曲

由廿世紀中期嗰陣打後,英屬香港發展得好快,香港人開始咗拍戲同電視劇,入面啲歌大半都係用廣東話唱嘅。但係真係要數專門用廣東話嚟唱歌就要去到 1970 至 80 年代先至正式開始。嗰時香港出咗鄭君綿鄧寄塵周聰陳寶珠蕭芳芳呢柞歌手。佢哋唱嘅粵語流行曲(粵拼:jyut6 jyu5 lau4 hang4 kuk1)係一種俾搖滾樂爵士樂、同電子音樂呢柞西方音樂(尤其係英國音樂)影響咗嘅新風格。佢哋題材好多樣化-有啲講情情塌塌嘅,又有啲講友情嘅。呢啲歌全世界都好多人聽,賣到去成個遠東地區-包括咗日本、韓國、臺灣、同東南亞-甚至乎連西人都有興趣。英文度仲開始有咗個詞,專係指粵語流行曲嘅-「Canto-pop」,又或者叫做「HK-pop」。由 1990 年代尾開始,HK-pop 喺個市場度開始唔夠 J-pop (日本)同 K-pop (韓國)砌,到咗家陣都仲係未見到乜嘢起色[3]

港產片 編輯

內文:港產片

港產片(粵拼:gong2 caan2 pin2)即係香港人做導演拍嘅戲。呢柞戲多數都係用廣東話嘅,但係某啲時期嘅戲當中都有啲國語片。香港喺廿世紀初頭已經有喺度整啲默片粵語殘片,但係嗰時啲港產片質素唔係好高,嶺南民間有人睇,但係好少可話外國會有人買。要去到廿世紀中後尾嗰陣,香港出咗李小龍許冠傑、同周星馳呢柞有朵嘅演員,港產片先至可以話上到去國際舞台。港產片不嬲係功夫片同喜劇做主導,會有好多無厘頭港式幽默喺入面(尤其係周星馳主演嗰啲),有自己嘅一套特色。喺佢最高峰嘅廿世紀尾,港產片係世界上其中一個最大嘅電影業,連歐美都有人睇,但係佢後尾個勢同粵語流行曲一樣:由 1990 年代尾開始,港產片喺國際市場度嘅競爭力開始下滑,而家都仲未有回升嘅跡象。

香港動畫 編輯

內文:香港動畫

香港動畫(粵拼:hoeng1 gong2 dung6 waa2)即係香港人整嘅動畫。佢哋幾乎全部都係用廣東話嘅,主要係以戲為主,好似係《麥兜》系列噉。香港動畫亦都有啲係由武俠故仔改編嚟嘅,例如係《風雲決》同《神鵰俠侶》。香港嘅動畫好多時會請日本公司幫手畫同加工,啲畫風自然俾日本影響咗。香港嘅動畫業可以追溯到 1948 年,嗰時嘅武俠片《江湖奇俠》入面有四分鐘嘅比武鬥法場面。佢入面嗰啲好似大笨象呢啲武器係用咗動畫整嘅,係香港最早期嘅動畫。後嚟喺 1976 年,香港無綫電視開咗一個動畫組,整咗一啲好似《跳飛機》同《430穿梭機》呢類嘅動畫短片。 1979 年香港電影文化中心開班教人整動畫,正式開始咗香港人整動畫嘅歷程。到咗今日,香港人已經識得喺廣告同網上整動畫,會有一啲惡搞性嘅動畫-好似係惡搞《叮噹》嘅《癲噹》,仲會出動畫戲,當中最勁嘅要數揚威法國、加拿大、韓國、同臺灣呢啲地方嘅《麥兜故事》。

文學 編輯

 
香港作家陶傑
內文:香港文學

香港不嬲都係地少人多,活動空間細,又冇乜特別嘅天然資源,令到寫嘢睇書做咗香港人其中一樣僅有嘅消遣。喺呢種環境之下,香港出咗唔少有料到嘅作家,仲有咗無論係響國際舞台定係唐文世界度都有些少朵嘅一套文學。英文入面仲有咗個詞叫做「Hong Kong literature」-香港文學[40]

香港文學係由廿世紀開始喺政治經濟環境特殊嘅香港產生出嚟嘅文學文化。香港話就話俾人嗌做「文化沙漠」,但係查實香港人寫嘅文學喺唐文世界以至成個國際社會都有啲地位。啱啱開頭嗰陣,香港文學主要係由啲喺廣東或者佢周圍地區走難落嚟嘅文人寫嘅。佢哋都係喺一個中原地區打仗打到七國噉亂又俾外國人哈嘅時代大嘅,所以佢哋寫啲嘢好多時都係喺度呻自己要屈喺香港呢笪「南蠻之地」,或者係講吓自己嘅愛國情懷。但係喺廿世期中期嗰陣,香港進步得好快,啲文人就開始會諗去寫一啲有香港本土特色嘅嘢,好似係馬朗寫嘅《太陽下的街》,就用咗 1956 年嘅九龍暴動做背景。因為嗰時嘅香港同其他亞洲地區比起上嚟叫做自由開放啲,香港人諗嘢寫嘢可以冇乜顧忌,加上同西人交流得多,出咗兩派思潮-主張要跟美國學嘢同用美國人風格寫嘢嘅「綠背文化」同埋反對呢種諗法嘅「左派」。再打後啲嗰幾廿年,香港嘅作家喺呢種自由嘅風氣之下同嗰時飛躍緊嘅香港電影電視業一齊搞嘢,將佢哋寫嘅其中一啲故仔拍做戲或者電視劇,出咗柞有睇頭嘅作家[41]

睇體裁嘅話,香港文學嘅特色係鍾意搵現實做主題,佢哋啲題材好貼近社會同生活,戀愛故仔同埋係講社會生活嘅散文普遍都受歡迎-好似係人氣作家張小嫻陶傑呀噉。但係香港都有出過第啲體裁嘅作家,好似係寫武俠金庸古龍,仲有係寫科幻倪匡。而喺近呢幾年,香港開始興網上小說,喺後生之間好有人氣,開始有唔少後生作家搞,令到佢做咗 80 同 90 後嗰代香港文學嘅新興勢力。總體嚟講,要數香港文學嘅主要作家嘅話有:

  • 張小嫻,寫言情同散文;出名嘅作品包括《麵包樹》系列同《都會愛情》系列。
  • 陶傑,出咗名推崇歐美文化;佢主要寫啲講文化嘅嘢,好似係喺報紙雜誌度寫啲討論西人文化嘅文。
  • 金庸,主打武俠;佢出咗《天龍八部》同《神鵰俠侶》。
  • 古龍,都係打武俠;佢嘅代表作有《楚留香傳奇》同《小李飛刀系列》。
  • 倪匡,主打科幻;佢係好出名嘅《衛斯理》系列同《原振俠》系列嘅作者。

粵文文學 編輯

雖然話香港有唔少有本事嘅作家,但係用自己嘅白話寫文學都仲係少見。喺呢方面,成個廣東話地區同其他東北亞地區-包埋韓國同越南-好似,傳統嚟講語同文係分開嘅:講嘢用各自嘅本土白話,寫嘢就用文言文。要喺成 19 世紀尾,呢一頭先開始有人正式噉用白話化啲嘅文字嚟寫文學。之不過,大中華地區都仲係離唔開用中文書面語-而中文書面語係攞普通話做板嘅,唔算係廣東話地區嘅白話。呢一樣嘢香港都走唔甩。頭先提咗嘅作家寫嘢冚唪唥都係用中文書面語,而唔係用粵文。但係喺廿一世紀開始有香港人就主張用粵文嚟寫文學[42]

娛樂 編輯

 
波子棋

玩具 編輯

香港玩具(粵拼hoeng1 gong2 wun6 geoi6)即係香港人玩嘅一啲玩具,包括咗象棋波子棋飛行棋陸軍棋東南西北樂高積木呢啲。呢柞玩具雖然唔算係香港獨有,但係好多香港人細個嗰陣都鍾意玩,令到佢哋做咗香港人嘅集體回憶之一。而且由 1960 年開始,香港仲有整啲自製玩具,甚至有人話要將香港打造成「玩具港」[43]。到咗今日,香港已經有定時定候搞一啲玩具展覽,而且有開始自己學整一啲玩具,仲出咗幾隻有睇頭嘅視像遊戲

視像遊戲 編輯

內文:香港 Game

香港人都整咗好幾隻 Game。Game 係泛指一啲識得喺一個顯示屏上面出畫面俾回輸同埋同玩嗰個人互動嘅電腦程式。佢哋係一種包含咗程式設計、視象設計、同音樂等各方面媒體嘅娛樂,喺全世界都有人鍾意,喺後生仔後生女之間人氣特別高。而且仲有研究話某啲類型嘅視像遊戲可以提升玩嗰個人嘅反應。到咗廿一世紀,香港 Game 正係處於起步階段,出咗幾隻有啲料到嘅作品:

飲食文化 編輯

內文:香港飲食文化

香港人嘅祖先由兩廣地區度帶咗啲粵式飲食落嚟,後嚟同西人同日本人等嘅外國人交流得多,開始有咗少少自己嘅風格。

粵式飲食 編輯

內文:嶺南文化#飲食文化

香港人嘅傳統飲食有齊嗮老火湯飲茶點心涼茶糖水、同燒臘呢啲特色嘢-好明顯係廣東菜:廣東菜(粵拼:gwong2 dung1 coi3),又叫做「廣州菜」,正式啲叫做「粵菜」,係指粵人獨有嘅一種傳統餸菜同煮餸嘅方法[44][45]。廣東菜係喺 10 至 13 世紀嗰時大致上有咗今日呢個樣嘅。佢係一種用料開放、清淡、講究火候、同善用湯水嘅餸菜。因為粵人歷史上多次規模移民去外國,令到佢喺國際社會都有啲認受性。呢個菜系歷史起碼有得追溯到去 13 世紀,而且佢成個食譜極之長,喺 1965 年嘅「廣州名菜美點展覽會」就數到成 5457 款餸菜噉多。而喺廿一世紀嘅香港周圍都見得到呢啲粵式嘢食同嘢飲。

圖庫

地道飲食 編輯

 
茶餐廳好興賣紅豆冰,尤其係夏天嗰陣。

雖然話就話香港嘅傳統飲食係以粵式嘢爲主,但係香港因爲俾英國殖民同大陸粵廣地區隔開咗百幾年,有咗少少自己嘅作風。大牌檔、茶餐廳、絲襪奶茶、豉油西餐、好多嘅街頭小食、瑞士雞翼蛋撻、同埋私房菜呢啲都俾人覺得係好有香港地道特色。總體嚟講,香港啲地道飲食主要特色係講求快同方便-反映香港嘅商業文化。

茶餐廳 編輯

內文:茶餐廳

大牌檔(粵拼:daai6 paai4 dong3)曾經係一種周街都係嘅食肆,但係因爲衛生條例同政府許可證問題,搞到大牌檔開始絕跡。佢哋慢慢將佢哋嘅茶水檔搬去室內,並結合以菠蘿冰、雜果冰同紅豆冰做招徠嘅冰室,演變咗做茶餐廳(粵拼:caa4 caan1 teng1[46][47]。廿一世紀嘅香港茶餐廳係一種平民嘅快餐飲食文化。佢哋嘅伙記同啲客嘅關係好多時都係好似老友噉,好多時啲嘢食都係講求快得嚟又唔肥膩,符合香港人嘅生活方式。嘢食方面,佢哋全日都會提供即食麵、雲吞麵、米粉、煎蛋、糭、同粥呢啲平嘢食。早餐就通常有牛油麵包、多士、雞蛋、腸仔、咖啡、奶茶、同蛋撻呀噉。大啲嘅茶餐廳仲會有炒粉麵,好似係乾炒牛河福建炒飯炒貴刁廈門炒米、同星洲炒米。有啲好似太興燒味茶餐廳兼營埋燒味業務。當日本菜喺香港開始受歡迎嘅時候,茶餐廳亦都開始供應日本熟食。飲食風格上,茶餐廳有齊粵同英嘅特性:佢會提供好多廣東菜嘅嘢食-好似係油炸鬼同炸兩呢啲粵式早餐嘢食喺茶餐廳早餐時段都會見到,但係又會見到啲英式嘢食,好似係咖啡、奶茶、或者蛋撻呢啲[48]

 
一杯絲襪奶茶

茶文化 編輯

內文:港式茶文化

香港嘅茶文化主要係由粵式茶文化演變出嚟嘅。同粵人嘅傳統飲茶有少少似,香港人(尤其係成年男人)好多都鍾意喺朝頭早返工之前去茶樓一路飲早茶一路嘆「一盅兩件」一路睇報紙。而且就算唔去茶樓,香港人都好興用啲茶包喺自己屋企度沖茶嚟飲。

港式茶文化最出位嘅係有自己一套風格嘅奶茶-絲襪奶茶(粵拼:si1 mat6 naai5 caa4)。據講香港俾英國統治嗰陣,英國人將「下午茶」呢個概念帶咗嚟香港:西人習慣咗喺下晏三點鐘左右走去享受西茶同甜品,同唐人唔同。俾呢種文化影響咗,香港人仲創造咗「絲襪奶茶」呢樣嘢。所謂嘅「絲襪奶茶」,係指緊將煮好咗嘅紅茶用一個棉線網過濾吓,除咗隔走啲茶渣之外,仲會令到紅茶更加香滑。傳統嘅港式絲襪奶茶會將淡奶加落煲好嘅錫蘭紅茶度。原創人本嚟係用白布袋過濾啲茶嘅,但係家吓大部分茶餐廳都係用棉紗網鑲喺一個金屬框架度整。因為棉紗網俾奶茶浸得多,個網嘅顏色會變到同絲襪好似,所以有咗個名叫「絲襪奶茶」。到咗今日,絲襪奶茶已經做咗香港嘅非物質文化遺產[49]

港島金鐘嗰度開咗間茶具文物館嚟展覽同推廣唐式茶文化。

一份典型嘅豉油西餐;有羅宋湯餐包做前菜,而主菜就係牛扒加腸仔配意粉
圍村盆菜

豉油西餐 編輯

內文:港式西餐

豉油西餐(粵拼:si6 jau4 sai1 caan1),又叫「港式西餐」,係一種有香港特色嘅「西餐」[50]。佢並唔係真係西人食嘅嘢(仲有,呢個世界上查實根本冇「西菜」呢樣嘢,只係有法國菜意大利菜西班牙菜、同埋俄羅斯菜呢啲),但係喺香港嘅「西餐廳」度成日都會見到。佢起源喺英治時期。嗰陣時會嚟香港嘅西人都係啲有頭有面又有錢嘅人。佢哋地位高,會喺自己嘅地頭度食啲高檔嘢食。香港嘅粵人平民多數都係食唔起西人食嗰啲餐,但係又好羨慕佢哋噉高檔,所以就自己學煮西人食嗰啲嘢,好快仲開始咗攞呢啲嘢食嚟賣-呢啲嘢食就係豉油西餐。豉油西餐會好似西歐傳統嘢食噉有好多扒類肉食同埋餐包,亦都會用刀叉食,但係啲煮嘢食技巧就用咗好多廣東菜嘅技法,會用豉油同鬆肉粉嚟煮肉,啲羅宋湯又會用番茄膏整(而唔係用正統嘅紅菜頭;仲有,羅宋湯係東歐嘅嘢食)[51]-即係用粵人嘅煮嘢食方法嚟煮西歐嘢食。總體嚟講,豉油西餐其實唔似任何一種真正嘅歐洲菜。雖然係噉,豉油西餐喺香港好有人氣,好多茶餐廳同快餐店都會賣。

街頭小食 編輯

內文:香港街頭小食

香港人喺 19 世紀嗰陣已經好鍾意食街頭小食,符合佢哋急速嘅生活節奏。到咗廿一世紀,街頭小食已經係香港飲食文化走唔甩嘅一部分,魚蛋、雞蛋仔、腸粉、碗仔翅、砵仔糕、格仔餅呢啲都係好有人氣嘅街頭小食。大部分香港街頭小食都係由廣東傳過嚟嘅,但亦都有啲係其他地區嘅嘢食,例如係薩琪瑪,就係滿洲嘅小食。有啲嘢更加係香港獨創嘅,好似係老婆餅老公餅噉。香港人普遍都鍾意喺旺角呢啲旺啲嘅地方度買啲街邊小販賣嘅小食,一路食一路行街,係一種好有本土特色嘅景象。

圍村盆菜 編輯

內文:盆菜

盆菜(粵拼:pun4 coi3)係新界圍村嘅飲食文化。佢係一種大雜燴,將好多種肉類、蔬菜、同埋海鮮用個大盆裝住,加啲自製醬汁,再成班人坐低一齊食。傳統嘅圍村盆菜多數係用木盆或銻盆裝住。而嚮喜慶節日-新居入伙、祠堂開光、或者新年點燈-新界嗰啲鄉下人都好興搞啲大型嘅盆菜宴,會成大班圍村人聚埋一齊食盆菜得嚟又會收錢請圍村以外嘅人一齊食佢哋整嘅「正宗圍村風味」盆菜[52]。而且喺廿一世紀開始,香港好多食肆都開始供應佢哋自己學整嘅盆菜,攞嚟喺大時大節嗰陣賣。

傳統節慶 編輯

 
同其他唐人一樣,香港人傳統過年嗰時鍾意買吉嚟表示「吉利」。
 
同其他唐人唔同,粵人過年會鍾意買好多花。香港人都係噉。
內文:香港節日

粵英薈萃嘅香港人有好多傳統節日,有啲係粵人以至其他唐人都會慶祝嘅,但係就算係噉,香港人會好似其他粵人噉會有一啲佢哋獨有嘅習俗,好似係過年:過年行花市同買花返屋企呢家嘢係粵文化嘅特色;海外唐人好多都會噉做,因為佢哋一路都係粵人佔咗多數;而香港人都會做呢樣嘢。但係粵人以外嘅唐人就好少可會搞呢樣嘢。香港仲有一啲本土特色節慶,例如係車公誕噉。好多香港嘅傳統節慶都充滿咗歡樂嘅色彩,又熱鬧又精采,有舞龍舞獅、飄色巡遊、賽龍舟、舞火龍、神功戲、祈福許願等。

唐式節慶 編輯

港式過年傳統:
其他唐式節日:
粵式節日:

西式節慶 編輯

本土節慶 編輯

核心價值 編輯

內文:香港核心價值

香港核心價值(粵拼:hoeng1 gong2 hat6 sam1 gaa3 zik6),又叫做「獅子山精神」,係一個喺廿一世紀初以嚟就有好多香港人傾緊嘅一個議題[54]。佢仲未有一套公認嘅精確定義,但係一般都會俾人覺得係指緊一啲香港賴以成功嘅價值觀。喺 2004 年 6 月,香港有一班專業人士喺報紙度一齊撰咗篇叫《香港核心價值宣言》嘅文,列舉咗一啲香港核心價值可能嘅內容,令到成個香港社會開始傾到底乜嘢先至算係香港人嘅核心價值。佢哋列嘅價值包括咗:

自由
民主
人權
法治
資本主義

類似嘅思想理念有支撐住現代美國同工業革命時期嘅英國嘅古典自由主義(classical liberalism)。

次文化 編輯

內文:香港次文化

互聯網文化 編輯

 
《香港網絡大典》2007年標誌
內文:香港互聯網文化

香港地少人多,冇乜活動空間,上網玩電腦變咗做香港人其中一樣僅有嘅搞作,令到香港出咗好多互聯網文化,仲有自己嘅一套術語-已經係一種次文化,好似係高登討論區同埋香港網絡大典呢啲嘢都係香港人整嘅。香港互聯網文化出咗名會創作好多俗語,甚至有啲會令睇得明正常粵文或者中文嘅人都睇到一頭霧水,俾人嗌做「火星文」。網誌亦都好有人氣,亦都有好多香港人會喺網上整啲二次創作嚟惡搞時事人物。總體嚟講,香港互聯網文化好活潑,鍾意惡搞,又作風自由,係一個可以俾唔同諗法互相碰撞嘅虛擬空間。

集體回憶 編輯

內文:香港集體回憶

集體回憶係一個由法國社會學家 Maurice Halbwachs 喺 1925 年提出嘅概念,係指一個群體或者社會入面嘅人共享同埋一齊傳承嘅嘢。喺香港人心目中好多嘢都係集體回憶[55]:粵語流行曲、出名嘅港產片同電視劇、本土嘅飲食文化、三年零八個月、香港主權移交呢啲往事或者文化產物都可以係香港集體回憶嘅一部份。喺 2006 年 11 月港府將愛丁堡廣場碼頭拆咗嗰時開始,香港人開始傾佢哋啲集體回憶,而喺 2007 年 1 月,港府更加講話將集體回憶列做拆唔拆歷史建築嘅考慮因素之一。喺廿一世紀初,香港人仲開始咗整一啲用集體回憶做題材嘅戲,好似係《我愛HK開心萬歲》、《72家租客》、《歲月神偷》呀噉。

少數族裔 編輯

內文:香港少數族裔

香港嘅少數族裔通常係指一啲住喺香港嘅非唐人,尤其係南亞裔或者東南亞裔嘅人[56]。呢個詞有時唔包日本人、韓國人、或者係越南人呢啲住喺香港嘅東北亞人-因為佢哋就噉望落同香港嘅粵人、非粵藉唐人、或者本地人冇乜大分別,都係蒙古人種東亞型。喺呢啲少數族裔當中,南亞裔嘅多數係英治時期嚟香港打啲僱傭兵之類嘅工嘅。佢哋都有自己嘅文化同信仰-多數係南亞嗰頭興嘅教,好似係印度教錫克教伊斯蘭教、同拜火教呢啲。另外,亦都有好多東南亞人嚟香港做外傭,好似菲律賓人印尼人就好興每逢禮拜日就喺香港嘅某啲地區嘅公園度聚集,係好有本地特色嘅景象。

圍頭文化 編輯

內文:圍頭文化

香港嘅圍村仲有一套自己嘅文化同風俗[57][58][59]。除咗頭先講咗嘅盆菜宴習俗之外,香港啲圍村仲有自己嘅語言-圍頭話。圍頭話同廣東話好接近,但又唔係完全互通得到,而且又有好多獨有嘅詞彙。去到廿世紀尾橛,圍頭話已經開始消失,圍頭人嗰啲後生仔後生女多數都最多只係識得聽,唔識得講。雖然係噉,好多圍頭人都仲係喺度承傳緊佢哋獨特嘅習俗,好似係添男丁要點燈同埋九缽盆菜呢啲。去到廿一世紀,香港人開始傾點樣保育圍村嘅傳統文化遺產。

其他 編輯

香港考試文化
香港示威文化
港鐵文化

象徵物 編輯

洋紫荊 編輯

內文:洋紫荊

洋紫荊(粵拼:joeng4 zi2 ging1),又叫「香港蘭」(Hong Kong orchid),可以話係香港嘅象徵符號。佢喺 1880 年嗰陣俾一個神父發現,後嚟喺 1908 年俾植物學界判定係之前未見過嘅新品種。洋紫荊跟手喺 1965 年嗰陣正式做埋香港嘅市花:當時啲人係話呢種花寓意咗香港呢個遠東海港,好似嗰樖喺 1880 年喺野外俾人發現嘅洋紫荊噉,係一個珍貴又獨特嘅大發現。而喺 1997 年主權移交之後,香港嘅特區區旗仲係攞咗洋紫荊嚟做板嘅。到咗今日,洋紫荊已經係香港嘅象徵物,啲人一見到洋紫荊就會諗起香港。香港嘅重要地標之一金紫荊廣場嗰度仲起咗座好大嘅金色洋紫荊雕像[60]

獅子山 編輯

內文:獅子山

獅子山(粵拼:si1 zi2 saan1),英文叫「獅子石」(Lion Rock),係九龍同新界之間嘅一座山,九龍山脈嘅其中一個峰,因為佢形狀似隻僕喺度嘅獅子所以噉嗌。喺獅子山舊石上面可以睇到嗮成個維多利亞港,所以好多行山人士同遊客都興行上去嗰度。獅子山仲喺香港身分認同度扮演咗重要嘅角色:二戰同國共內戰嗰時有好多華人(主要係粵人)走難落嚟香港,而且係低下階層嘅多。佢哋到咗步就喺獅子山對開嘅九龍起咗成大柞山邊寮屋、唐樓、公共房屋、工廠大廈、同山寨廠嚟定居,令到「獅子山下」做咗當時香港社會嘅象徵。香港電台後嚟仲整咗《獅子山下》呢套電視劇,令到獅子山下嘅景象做咗香港人嘅一種集體回憶,而且香港核心價值仲有咗另外一個名-叫「獅子山精神」。獅子山可以話係代表香港嘅重要象徵物。

大眼雞 編輯

內文:大眼雞 (船)

大眼雞(粵拼:daai6 ngaan5 gai1)係一種粵式帆船。舊時喺廣東嗰頭成日見到佢,主要係嗰度啲粵人用嚟做生意同運貨嘅。因為香港俾咗英國之後就係噉同外界搞生意,加上香港人又係以粵人為主,所以大眼雞喺嗰時嘅香港可以話周圍都係。到咗廿一世紀,香港已經唔會再用大眼雞運貨,但係始終呢種船見證咗香港嘅歷史,所以香港啲旅遊單張嗰度成日都見到佢,而且好多香港人都鍾意靠佢搵食-好似係用大眼雞嚟開水上餐廳,或者係用佢載住啲遊客遊維港呀噉。

香港影像 編輯

睇埋 編輯

其他香港文化 編輯

香港公民社會 編輯

相關文化 編輯

其他 編輯

編輯

  1. Luk, B. H. K. (1991). Chinese culture in the Hong Kong curriculum: heritage and colonialism. Comparative Education Review, 35(4), 650-668.
  2. 2.0 2.1 Siu-Lun, W. (1986). Modernization and Chinese culture in Hong Kong. The China Quarterly, 106, 306-325.
  3. 3.0 3.1 3.2 Gold, T. B. (1993). Go with your feelings: Hong Kong and Taiwan popular culture in Greater China. The China Quarterly, 136, 907-925.
  4. Siu, H. (1996). Remade in Hong Kong: weaving into the Chinese cultural tapestry. Unity and diversity: Local cultures and identities in China, 1, 177.
  5. 廣府文化與百越族文化的關係
  6. Churchman, C. (September 14, 2016). The People between the Rivers: The Rise and Fall of a Bronze Drum Culture, 200–750 CE, USA: Rowman & Littlefield Publishers, . ISBN-10 1442258608.
  7. 崖山之後無中國,閻吏之後無漢人[失咗效嘅鏈]
  8. . 原著喺2016年11月11號歸檔. 喺2017年6月10號搵到.
  9. 唐孝祥. (2003). 试论近代岭南文化的基本精神 (Doctoral dissertation).
  10. 梁凤莲. (2003). 岭南文化的历史与现实视界 (Doctoral dissertation).
  11. 刘益. (1997). 岭南文化的特点及其形成的地理因素. 人文地理, 12(1), 44-46.
  12. . 原著喺2021年11月21號歸檔. 喺2017年6月10號搵到.
  13. 13.0 13.1 Chen, M., & Newman, J. (1984). From Middle Chinese to Modern Cantonese (Part I). Journal of Chinese Linguistics, 12(1), 148-97.
  14. 14.0 14.1 Chen, M. Y., & Newman, J. (1984). From Middle Chinese to Modern Cantonese (Part 2). Journal of Chinese Linguistics, 334-388.
  15. 15.0 15.1 Chen, M. Y., & Newman, J. (1985). From Middle Chinese to Modern Cantonese (Part 3). Journal of Chinese Linguistics, 122-170.
  16. Bauer, R. S. (1985). The expanding syllabary of Hong Kong Cantonese. Cahiers de linguistique Asie orientale, 14(1), 99-111.
  17. Bauer, R. S., Kwan-Hin, C., & Pak-Man, C. (2003). Variation and merger of the rising tones in Hong Kong Cantonese. Language Variation and Change, 15(2), 211-225.
  18. . 原著喺2015年10月22號歸檔. 喺2017年6月11號搵到.
  19. Hongkongers mix English and Cantonese into new language, Kongish
  20. 唐孝祥. (2003). 近代岭南建筑美学研究 (Vol. 2, No. 0, p. 0). 中国建筑工业出版社.
  21. 何镜堂, & 王扬. (2003). 当代岭南建筑创作探索 (Doctoral dissertation).
  22. 淺談嶺南民居的嶺南建築特色
  23. . 原著喺2017年2月28號歸檔. 喺2017年6月25號搵到.
  24. . 原著喺2019年4月7號歸檔. 喺2017年6月25號搵到.
  25. 南畫派 - 嶺南畫派的淵源. 原著喺2017年3月17號歸檔. 喺2017年6月18號搵到.
  26. . 原著喺2017年9月21號歸檔. 喺2017年6月18號搵到.
  27. 黃聖芝. (2014). 廣彩外銷瓷研究. 臺北藝術大學美術學系碩士班美術史組學位論文, 1-183.
  28. 贺海燕. (2005). 广彩瓷器 (Doctoral dissertation).
  29.  . 原著喺2017年4月18號歸檔. 喺2017年6月15號搵到.
  30. 狂畫室 Gibson Lau 劉忠發. 原著喺2017年6月14號歸檔. 喺2017年6月18號搵到.
  31. 香港雕塑雙年展2016
  32. Mongkok’s Graffiti Wall Of Fame!
  33. 33.0 33.1 33.2 Yung, B. (1989). Cantonese opera: performance as creative process. Cambridge University Press.
  34. 香港八和會館
  35. . 原著喺2016年3月29號歸檔. 喺2017年8月21號搵到.
  36. 香港廣東音樂團 Hong Kong Cantonese Orchestra
  37. . 原著喺2017年6月14號歸檔. 喺2017年6月18號搵到.
  38. "HKPhil". 原著喺2017年7月3號歸檔. 喺2017年6月26號搵到.
  39. . 原著喺2017年6月10號歸檔. 喺2017年6月26號搵到.
  40. 黃英哲. (2004). 香港文學或是台灣文學: 論 [香港三部曲] 之敘述視野. 中外文學, 33(7), 129-152.
  41. . 原著喺2017年8月19號歸檔. 喺2017年6月15號搵到.
  42. 蒙與革命 - 鄭貫公、黃世仲等人的粵語寫作. 原著喺2018年8月21號歸檔. 喺2017年6月15號搵到.
  43. . 原著喺2017年6月25號歸檔. 喺2017年6月19號搵到.
  44. Klein, J. A. (2007). Redefining cantonese cuisine in post-Mao Guangzhou. Bulletin of the School of Oriental and African Studies, 70(3), 511-537.
  45. Pennington, J. A. (1996). Cuisine: A descriptive factor for foods. Terminology. International Journal of Theoretical and Applied Issues in Specialized Communication, 3(1), 155-169.
  46. 港人的驕傲——冰室、餐室、茶餐廳文化 . 原著喺2017年8月21號歸檔. 喺2017年6月20號搵到.
  47. 港人的驕傲——冰室、餐室、茶餐廳文化 . 原著喺2017年8月21號歸檔. 喺2017年6月20號搵到.
  48. 畫●殖民產物記酒樓有…英國留給我們的好西. 原著喺2017年7月4號歸檔. 喺2017年7月3號搵到.
  49. . 原著喺2016年1月4號歸檔. 喺2017年6月28號搵到.
  50. 西餐愛港味 互聯網檔案館歸檔,歸檔日期2018年9月24號,.,太陽報,2013年7月17日
  51. 名廚精裝 貴格港式西餐 互聯網檔案館歸檔,歸檔日期2017年2月2號,.,香港新聞網,2013年7月17日
  52. 6大圍村風味盆菜[失咗效嘅鏈]
  53. "Hong Kong Well Wishing Festival". 原著喺2017年6月25號歸檔. 喺2017年6月21號搵到.
  54. . 原著喺2018年6月13號歸檔. 喺2017年6月21號搵到.
  55. . 原著喺2016年10月10號歸檔. 喺2017年6月21號搵到.
  56. . 原著喺2008年5月6號歸檔. 喺2017年6月26號搵到.
  57. . 原著喺2016年7月30號歸檔. 喺2017年6月22號搵到.
  58. 傳統圍村小食工作坊
  59. Home of Indigenous Culture 傳統圍村文化之家
  60. 许霖庆. (1997). 香港市花洋紫荆. 植物杂志, (4), 17.

出面網頁 編輯