香港蘇文大學

香港蘇文大學係間喺2015年2月被香港傳媒踢爆嘅假大學，被揭發賣「香港蘇文大學遠程函授學位」畢業證書，但其實根本無呢間大學。

詳情

騙徒虛構一間根本唔存在，亦都無喺香港教育局註冊嘅「香港蘇文大學」，聲稱係中國大陸授權機構同埋香港註冊教育機構，喺1989年創校，設有附屬小學同中學，報稱辦公室地址係香港島灣仔區灣仔駱克道駱基中心23樓（經求證係一間秘書公司地址）。與此同時，騙徒仲整埋個網站展示校舍照片，但其實係香港國際金融中心、海港城、港鐵站、香港大學及香港中文大學等地方，又配以時任香港中文大學校長沈祖堯同學生嘅合照，同埋前香港行政長官曾蔭權出席教育活動時嘅陳年照片，又有教育統籌局發出嘅感謝狀等等。喺事件入面，騙徒被揭發喺淘寶販賣「香港蘇文大學遠程函授學位」畢業證書，包括副學士、學士、碩士等，價錢由100至1,000人民幣不等。

2015年2月，經過蘋果日報查證，發現新華網、百度百科同互動百科都喺2014年介紹過「香港蘇文大學」，話香港蘇文大學係「英才發源地」。事件被揭發後，香港教育局提醒「香港蘇文大學」唔係香港註冊或臨時註冊學校，香港中文大學就聲明同「香港蘇文大學」無任何關係，批評對方擅自盜用香港中文大學多張照片，行為唔可以容忍，保留法律追究權利。

去到同月2號傍晚，自稱係「香港蘇文大學」董事長嘅陳繼岸透過網站發表聲明，聲稱公司管理嚴重失誤，為外界造成困擾同傷害，特別係未經沈祖堯允許而擅自盜用圖片，就此深表歉意。陳繼岸又澄清，公司未有實際營運任何項目，工作人員搞網站嗰陣擅自用咗啲圖片同內容，並且加以處理，公司對有關行為無法接受，已經炒咗有關人員，並且即時關閉網站。此外，中國大陸嘅授權點重未經過公司同意，因此擅自頒發所謂學位證書係虛擬性質，證書喺中國大陸並無任何法律效用。

流行文化

2015年年宵，有大學畢業生睇中香港蘇文大學事件引起嘅商機，趁「香港蘇文大學」網站未關閉前，下載相關畢業證書，重新設計，推出惡搞版本「香港蘇文大學」畢業證書。