香港電影資料館

香港電影資料館（Hong Kong Film Archive，HKFA）係保存同展覽香港電影同埋相關資料嘅博物館，由康樂及文化事務署管理。

概況

香港電影資料館位於香港島西灣河鯉景道50號，樓高4層，總樓面面積7200平方米。大樓分為兩部分，每層都有半邊作為藏品室。而另一半就係展覽廳同埋電影院，畀人參考用嘅資源中心。

資料館為香港市民推廣香港電影藝術，並為電影工作者同研究者提供大量資料。資料館目前收藏電影拷貝超過5600部，最早嘅係1898年美國愛迪生公司響香港拍攝嘅風光紀錄短片，館藏亦有唔少香港出品嘅電影，例如1939年蔡楚生導演嘅抗戰愛國名作《孤島天堂》同埋由著名影星胡蝶、吳楚帆主演嘅《南國姊妹花》等。資料館亦收藏電影嘅相關資料，包括劇照、劇本、電影海報、電影原聲唱片、影片特刊同合約文件、電影獎座、道具等。豐富而珍貴嘅館藏令資料館被《時代雜誌》形容為香港以及亞洲最偉大嘅視覺藝術寶藏同二十五項「遊客不容錯過的亞洲體驗」之一。