馬其頓命名爭議

馬其頓命名爭議Máhkèihdeuhn mihngmìhng jāngyíh （馬其頓文：Спор за името помеѓу Македонија и Грција；希臘文：Μακεδονικό ονοματολογικό ζήτημα）係指一個希臘同馬其頓共和國（現北馬其頓）關於後者國名嘅爭議，1991年喺馬其頓共和國由南斯拉夫獨立嘅時候開始，2019年結束。呢場爭議困擾坡勤半島多年，25年嚟係當地唔穩定嘅其中一個根源，喺南斯拉夫時期已經存在，但係喺南斯拉夫解體馬其頓共和國獨立嗰陣再次點燃。

馬其頓地區嘅地理同政治邊境

  現代馬其頓地區定義

  古馬其頓王國

  北馬其頓

  希臘馬其頓尼亞

呢場爭議環繞住馬其頓共和國、鄰近屬希臘嘅馬其頓尼亞大區同古希臘嘅馬其頓王國嘅命名混淆。希臘政府因此反對馬其頓共和國淨叫「馬其頓」。希臘仲以住喺希臘馬其頓尼亞嘅馬其頓人同住喺馬其頓共和國嘅馬其頓人係兩種唔同嘅民族嘅原因而進一步反對馬其頓共和國嘅語言同民族淨叫做「馬其頓文」同「馬其頓人」，批評馬其頓共和國提倡馬其頓民族統一主義。希臘亦指控馬其頓共和國盜竊希臘嘅文化象徵，例如維吉納之星同亞歷山大大帝。

1995年，兩國正式建立雙邊關係，並且承諾喺聯合國嘅主持下開始就命名問題進行談判。解決方案達成之前，多個國際組織同國家暫時用「前南斯拉夫馬其頓共和國」（ FYROM ）。聯合國成員國同聯合國本身都同意接受兩國成功談判所產生嘅任何名稱。各方由大使華斯歌・紐麼夫士其（Васко Наумовски；馬其頓方）同亞打曼地柯士・華斯拉其斯（Αδαμάντιος Βασιλάκης；希臘方）代表，並由自1994年起就開始關注呢個問題嘅美籍外交官馬富 · 尼密斯（Matthew Nimetz）調解。

雙方喺2018年6月12號達成協議。2018年9月30號，馬其頓舉行公投，選民以壓倒性嘅票數接受普雷斯帕協議。不過，選民投票率遠低於驗證結果所需嘅50%門檻。因此，協議必須由馬其頓議會以三分之二多數批准。協議獲雙方批准後，喺2019年2月12號生效，馬其頓共和國正式改名為現今嘅「北馬其頓共和國」。