高士威道

高士威道（英文：Causeway Road，意思係「海堤路」），係香港一條主要道路，喺香港島銅鑼灣，西面接住怡和街，東面接住英皇道，長約530米。

高士威道夜景

以前，呢條道路分隔開東區同灣仔區，北面嘅維多利亞公園屬東區，南面嘅皇仁書院同香港中央圖書館屬灣仔區。2014年開始，維園同天后撥埋入灣仔區，呢條路就唔再係區界。

高士威道原身係條堤。舊時銅鑼灣係個大海灣，成個銅鑼咁，個岸大概係今日銅鑼灣道。而高士威道條堤，就喺正個灣出面，分開維多利亞港同銅鑼灣。