開主選單

齊孝昭帝高演535年561年),字延安,係北齊第三代皇帝。佢係東魏權臣高歡第六個仔,亦係高洋個細佬。[1]高演後生嗰陣魁偉英武,佢阿媽婁昭君好鍾意佢。[2]

經歷

東魏元象元年,皇帝元善見封高演做常山郡公[3]。高演係個聰明仔,佢博覽群書,滿腹經綸[4]高洋執政之後,派中書侍郎李同軌做高演嘅老師[5],令高演如虎添翼。

天保年間,高演升做常山郡王[6]。高演做嘢講道理,所以滿朝文武大臣都服佢[7],佢喺處理政務方面表現出色,連皇帝高洋都睇重佢[8]。天保八年,高演升做司空,兼任尚書監工[9]。高演份人好嚴,有一次,尚書郎中出錯,高演即刻重罰佢[10]

高洋死後,皇太子高殷繼承皇位。因為高殷好細個,所以高演攞正牌代高殷處理政務,成為國家真正嘅決策人。[11]乾明元年,高演聯合各大權貴、文武大臣,逼高殷升佢做太師司州牧[12]同一年嘅三月,高演終於聯同長廣王高湛發動政變,廢黜高殷,自立做皇帝[13],改年號做皇健,嗰陣時高演得二十六歲。事後,雖然太后婁昭君要求高演保住高殷條命,但係高演為咗免除後患,暗殺咗高殷。

做咗皇帝之後,高演積極處理政務,體恤貧苦大眾,知人善任[14]。但係好景不常,兩年之後,高演騎騎吓馬無啦啦跌親,傷重不治,相傳係高殷嘅鬼魂報仇。高演死嗰陣得二十七歲。高演嘅廟號係肅宗,謚號係孝昭皇帝。而北齊皇位嘅繼承人係高演嘅細佬、長廣王高湛

家室

后妃

  1. 元皇后
  2. 桑嬪
  3. 楊嬪
  4. 毛夫人

  1. 樂陵王高百年
  2. 襄城王高亮
  3. 汝南王高彥理
  4. 始平王高彥德
  5. 城陽王高彥基
  6. 定陽王高彥康
  7. 汝陽王高彥忠

  1. 建昌長公主高善德

參攷

  1. 北齊書》卷五 補帝紀第五:「孝昭皇帝演,字延安,神武皇帝第六子,文宣皇帝之母弟也。」
  2. 北齊書》卷五 補帝紀第五:「幼而英特,早有大成之量,武明皇太后早所愛重。」
  3. 北齊書》卷五 補帝紀第五:「魏元象元年,封常山郡公。」
  4. 北史》卷七 孝昭帝:「帝所覽文籍,源其指歸,而不好辭彩。每歎云:『雖盟津之師左驂震而不衂』,以為能。遂篤志讀漢書,至李陵傳,恒壯其所為焉。」
  5. 北史》卷七 孝昭帝:「及文襄執政,遣中書侍郎李同軌就霸府為諸弟師。」
  6. 北史》卷七 孝昭帝:「天保初,進爵為王。」
  7. 北史》卷七 孝昭帝:「帝善斷割,長思理,省內畏服。」
  8. 北史》卷七 孝昭帝:「帝長於政術,割斷咸盡其理,文宣歎重之。」
  9. 北史》卷七 孝昭帝:「八年,轉司空、錄尚書事。」
  10. 北史》卷七 孝昭帝:「帝性頗嚴,尚書郎中剖斷有失,輒加捶楚,令史姦慝,便即考竟。」
  11. 北史》卷七 孝昭帝:「及文宣崩,帝居禁中護喪事,幼主即位,乃即朝班。除太傅、錄尚書事,朝政皆決於帝。」
  12. 北史》卷七 孝昭帝:「時楊愔、燕子獻、可朱渾天和、宋欽道、鄭子默等以帝威望旣重,內懼權逼,請以帝為太師、司州牧、錄尚書事。」
  13. 北史》卷七 孝昭帝:「帝旣當大位,知無不為,擇其令典,考綜名實,廢帝恭己以聽政。太皇太后尋下令廢少主,命帝統大業。」
  14. 北史》卷七 孝昭帝:「帝聦敏有識度,深沈能斷,不可窺測。身長八尺,腰帶十圍,儀望風表,迥然獨秀。自居臺省,留心政術,閑明簿領,吏所不逮。及正位宸居,彌所克勵,輕徭薄賦,勤恤人隱。內無私寵,外收人物,雖后父,位亦特進無別。日昃臨朝,務知人之善惡。」