魷魚 (遊戲)

魷魚（韓文：오징어），係韓國嘅一種細路遊戲。主要流行喺20世紀70至80年代初韓國嘅細路仔之間，遊戲場地主要喺兒童遊樂場、學校操場或鄰近嘅巷仔。

魷魚遊戲場地

隨住土地被石矢覆蓋同發展，遊戲空間消失，導致遊戲逐漸式微，魷魚遊戲喺1980年代之後已經唔再喺細路之間流行。

遊戲名

遊戲之所以有噉嘅名，係因為遊戲場地上面嘅圖案由圓形、三角形同正方形組成，形狀好似魷魚噉。呢個遊戲名存在地區差異，例如又叫做「魷魚蓋桑」（오징어 가이상）。有部分人堅持認為「蓋桑」係日文「開戰」（日文：開戦／かいせん ^kaisen）嘅變體，係朝鮮日治時期遺留落嚟嘅詞彙，但係呢個詞冇喺時代轉變時畀人清洗，而家已經喺某種程度上融入韓國民俗。

玩法

佢係一款多人遊戲，可以由3至10個人玩，最多可以容納20個人，玩家用猜包剪揼分為攻守兩隊。遊戲主要有兩個獲勝方式，一個係攻擊者抵達目的地，另一個係殲滅對方所有成員。攻守兩隊嘅主場稱為「屋」。最上面嘅圓圈係進攻隊嘅屋，而底部嘅長方形係防守隊嘅屋。呢個遊戲通常係進攻方佔優勢，而對防守方不利。

遊戲區域

• 1區係攻方嘅起點
• 3區係守方嘅起點
• 2區係當任何一個攻方玩家成功到達之後，攻方就獲得勝利
• 3區底部係門嘅位置，攻方需要從外面通過呢度門先至可以入到3區，唔可以喺出面跳入去，犯規嘅會被淘汰。而守方亦必須通過呢度門先至可以出到外面，如果喺3區跳出外面都係犯規，會被淘汰
• 4區係一條河，當攻方過咗河之後，就可以雙腳行

走動限制

攻方喺1區、4區外嘅圓形區、3區門外可以用雙腳嚟行，喺其他地區必須單腳跳。4區係一條河，一旦攻方以單腳跳過河，就可以改為雙腳行。

守方喺1區、3區、3區嘅門、4區外嘅圓形區可以雙腳行，但如果跳咗出道門，就必須單腳跳噉同攻方對抗。

淘汰方法

• 要喺單腳跳嘅時候，另一隻腳掂到地
• 雙腳行走嘅時候手掂到地，例如自己跌低或俾對方整跌
• 以線為界，俾對方拉入或拉出自己嗰方所屬嘅區域，會被淘汰
• 踩線，當雙方玩家嘗試將對方拉入自己嗰區嘅時候，踩到界嗰一方會被淘汰

獲勝方式

攻方獲勝有兩種方式，第一種係將守方玩家全部淘汰，第二種係有其中一個攻方玩家成功到達2區。

守方獲勝嘅方式係唔好俾任何一個攻方玩家成功抵達2區，並且將全部攻方玩家淘汰。

流行文化

2021年Netflix電視連續劇《魷魚遊戲》嘅標題就係嚟自劇裏面嘅魷魚遊戲，第一集開頭提個呢個遊戲，最後一集以呢個遊戲嚟定出最後贏家。喺電視劇《魷魚遊戲》風靡全球嘅浪潮之下，魷魚遊戲重新開始流行起嚟。